Google+

Sang Hyang Tattwa Jnana

Sang Hyang Tattwa Jnana

Oṃ awighnam astu namaḥ siddham. om.

Nihan kayatnakna de sang sewakadharmma sang mahyun luputeng janmasaṃsara, hana sang hyang tattwajnana ngaranira, ya tika kawruhaknanta rumuhun lawanika dewatanya, enak pwa wruh ta ring sang hyang tattwajnana, niyata sira tumon janmasangsara mwang mantuka ri sangkanya. aparanika sinanggah sang hyang tattwajnana ngaranira, sugyan mangkana linga sang para, anam pih sang hyang tattwajnana ngaranira anung pinakabungkah ning tattwa kabeh, ndya lwirnya nihan.1

cetana acetana, cetana ngaranya jnana wruh menget ring tutur tan pabalik lupa, acetana ngaranya ikang lupa wyamoha tan kahanan tutur. ikang cetana lawan acetana yeka sinangguh siwatattwa lawan mayatattwa, ikang cetana yeka siwatattwa, ikang acetana yeka mayatattwa, paḍa litnya mwang suksmanya, kunang kasor nikang mayatattwa de ning siwatattwa, tan pacetana tan pajnana ikang mayatattwa, kewala lupa tan kahanan tutur taya pinakawaknya, awangwang uwunguwung tan pagamongan lupa wiparita swabhawa nikang mayatattwa. tutur prakasa pwa swabhawa nikang siwatattwa, ikang sinangguh siwatattwa tiga prabhedanya, lwirnya. paramasiwatattwa sadasiwatattwa atmikatattwa. 2

paramasiwatattwa ngaranya kasthityan bhatara ring niskala, tan polah tan limbak tan laku tan hili tan pasangkan tan paparan tan pawitan tan pawkasan, kewala sthiti umingeng humneng langgeng juga sira, ibek tang rat kabeh de nira, kakasut kahma kawyapaka kabeh kang saptabhuwana de nira, saptapatala sunḍul wuntu, sasek pnuh lyab kang jagat de nira, tan kawnang linongan tan kawnang tinambehan, niskaryya nisprayojana juga sira, tan para wyapara ring halahayu, nirhuninga ta sira ika kabeh, mwang tan hana ng titanagatawarttamana ri sira, tan kahhletan sira de ning kala, rahina sada juga sira, tanpa kahilangan lana juga sira, nahan laksana bhatara paramasiwatattwa, yeka kasthityan bhatara ring niskala ika, sira ta bhatara paramasiwatattwa ngaranira. 3

nihan sadasiwatattwa ngaranira, wyapara ta bhatara sadasiwatattwa, wyapara ngaranya kinahanan sira de ning sarwwajña mwang sarwwakaryyakartta sira, sarwwajña sarwwakaryyakartta ngaranya, anam pih, hana padmasana palunggahan bhatara cadusakti ngaranya, lwirnya. jnanasakti wibhusakti prabhusakti kriyasakti, nahan tang sinanggah cadusakti ngaranya. jnanasakti ngaranya tiga prabhedanya, lwirnya, durada[sa]rsana durasrawana duratmaka. durada[sa]rsana ngaranya tumon ing adoha park , nahan ta ng sinangguh jnanasakti ngaranya. wibhusakti ngaranya tan hana katunanira irikang rat kabeh. prabhusakti ngaranya tan kalangghanan ri sakeccha nira. kriyasakti ngaranya sira humanak ikang rat kabeh nguni weh ikang watek dewata kabeh, kady anggan ing brahma wisnu iswara pañcarsi saptarsi dewarsi indra yama waruna kubera waisrawana widyadhara gandharwwa danawa daitya raksasa bhuta yaksa bhuta dengen bhutakala bhutapisaca, nguni weh ikang bhuwana prthiwi apah teja wayu akasa candra aditya taragana, yeka gawe bhatara sadasiwatattwa ring niskala ika kabeh. kunang gawe bhatara sadasiwatattwa ring sakala, sang hyang sastra agama aji waidya tarkka wyakarana ganita yatika gawe bhatara sadasiwatattwa, an sira pramana irikang rat kabeh sira makadrwya irikang sakala niskala, sira ta bhatara adipramana ngaranira, sira ta bhatara jagannatha ngaranira, sira ta bhatara makarana ngaranira, sira ta bhatara parameswara ngaranira, sira ta bhatara guru ngaranira, sira ta bhatara mahulun ngaranira, sira ta mangaran bhatara wasawasitwa, ika ta kabeh, siragawe tan ginawe, sira ta wnang manghanaken wnang manghilangaken, tan hana lumwihana kaiswaryyanira, sira ta bhatara guru ning guru, nahan ta laksana bhatara sadasiwatattwa. 4

nihan tang sinangguh atmikatattwa ngaranya, bhatara sadasiwatattwa kunang laksanahanira, utaprota, uta ngaranya kadyanggan ing puy hana ringeseyen, suksma juga kangpuy hana ring kayu pring, mangkana ta bhatara sadasiwatattwa an wyapaka ring mayatattwa, tan katon tan kinawruhan, sira wibhu hunibeki ng mayatattwa, prota ngaranya kadyanggan ing manik sphatika ahrhnang hamayamaya trusalilang tan kawaranan, raktakna irikang warnna, dadi masalin warnna ikang manik sinaput de nikang warnna rakta ring mayatattwa, tan katon tan kinawruhan, sira sira wibhu humibeki ng mayatattwa sinaput de nikang warnna raktanya jugekang manik, makanimitta pasahakna ikang manik lawan warnna, ndan irika mulih rupa nikainghna , ikang warnna raktanya nguni hana ri kawaknya jugeka wkasan. kadi mangkana ta bhatara sadasiwatattwa an wyapaka cumetanekang mayatattwa, mala pwa swabhawa nikang mayatattwa, ya ta sinangguh koparngga karaktan mala ngaranya, matangnyan kadi hilang kahiḍepanya sakti bhatara wkasan, kintu taha, apan sphatikopama ktang bhatara sadasiwatattwa tan wnang cinampuran, tuhun cetana nira juga karaktan mala, koparnggan sinaput de nikang mayatattwa, kawkas tang cetana lngelnge , mari sarwwajña mari sarwwakaryyakartta, tuhun makawak tuturmmatra, juga kang cetana wkasan, ndan sira ta sinanggah ta atmikatattwa ngaranira, sira ta sang hyang atma wisesa ngaranira, sira ta bhatara dharmma ngaranira, sira ta humibeki ng rat kabeh, sira ta pinakahuripi ng rat kabeh sarwwajanma kabeh, nahan papaḍanira kady anggan ira sang hyang aditya, tunggal sira tka wyapara ring abhyantara, tuhun teja nira juga lumra mahasing dasadesa, humibeki ng rat kabeh tumeja ning halahayu abo lawanawangi, ikang teja tumeja ning halahayu abo lawanawangi, ikang teja tumeja ning halahayu akweh gawe ning teja sang hyang aditya, hana maring hala hana maring hayu hana maring abo hana maring awangi hana maring rupawarnna, tlas karuhun sang hyang aditya, sarwweccha sang hyang aditya juga sira hana ring abhyantara. mangkana ta bhatara dharmma tuhun hana ring niskala juga sira makawak ikang turyyapada, tuhun cetana nira juga lumra humibeki ng rat kabeh, matmahan saṃsaya ganal pinakahurip ning sarwwajanma kabeh, maya ta sinangguh cetana mañetana ngaranya. 5

nihan prastawan bhatara dharmma anung mrddhyaken cetana nira, bhatara mahulun sira mahyun manon wastu sakala, ya ta matangnyan iniccha nira ta sang hyang atma pinatemwaken ira lawan pradhanatattwa, pradhanatattwa ngaranya anak ning mayatattwa, ya ta matangnyan lupa wiparita swabhawa nikang pradhanatattwa, turu ngaranya ring manusa, lupa pwawak ning pradhanatattwa, tutur prakasa pwawak sang hyang atma, ikang tutur matmu lawan lupa ya ta sinangguh pradhanapurusa ngaranya, ri pamanggih ikang pradhana lawan purusa ika ta yan panak citta lawan guna, citta ngaranya ganal ning purusa, guna ngaranya dadi ning pradhanatattwa, an kacetana de ning purusa, ikang guna tiga prabhedanya, mapalenan lwirnya, sattwa rajah tamah, yeka sinangguh triguna ngaranya, ya ta pinakaguna de ning citta, nahan tang citta sattwa citta rajah citta tamah. 6

citta ngaranya cetana sang purusa karaktan koparngga de ning triguna, citta ngaranya wkasan, laksananya kengetakna. yan sattwa prakasa rumaket irikang citta yeka prajña widagdha wruh ri yogya lawan tan yogya akamulyan denyamawambek ahadyan tngen, tan guragaḍa tan babakujar, bhakti tonan dugaduga asih ta ya ring kasyasih anumoda ring hinadina tuneng sungsut satyabhakti arumpating halanya, saumya wacananya aten ta ya ngucap sastra kamuni wacananya, utsahangusing guna pangwruh kasamyagjnanan, tan pamali nghela tan kneng sungmut, kewala buḍah patinghananya, sapolahnya mangdadyaken harsa ring sang tuminghal, sabdanya mangdadyaken karnnamanohara ring sang mangrangö, maharddhika pahambekanya mangdadyaken trpti paritusta ring citta ning para, masor ta ya ring abhipraya, mangga kociwaha, tan keponumahar sukhambek ning para, tatan ahangkara tan moha denyamawa prawrtti, kewala buḍah santalilaṃ ahning nirawarana tan patalutuh, atah pinakajnananya asri patinghalanya, yeka wyakti nikang citta sattwa, nihan laksana nikang citta sattwa an rumaket irikang citta. 7

nihan laksana nikang citta rajah an rumaket irikang citta, cañcala adrs molah asighra panasbharan, aglis bangga irsya salahhasa sahasa capala wawang tka sahasa tunengasih tuneng wlasih kumalwihaken awak guna göng hati krodhanya göng ge sungsut ahangkara lobha dambha krura tar atakut kabhinawa sapolahnya mangdadyaken krs ning tuminghal, sabdanya mangdadyaken karnnasula ring sang mangrengö, alangghya ruhur pambekanya mangdadyaken hewa ning citta ning para, tan angga korurwa tan angga sor ring abhipraya, yeka wyakti nikang citta rajah an rumaket irikang citta. 8

nihan laksana ning citta tamah an rumaket irikang citta, abeyet almeh guhya simpneh kalusa amangna tan anghel atis arip bot turu geng muḍha geng raga gengelik geng hyun geng wisaya drḍha ta ya suklasonita mapulang maturu lawananak rabinya, mangkana wyakti nikang citta tamah, nahan laksana ning citta tamah an rumaket irikang citta. 9

ikang sattwa rajah tamah rumaket irikang citta yeka nimitta ningatma na patmah tmahan. nihan kramanya kengetakna, yan sattwa kewala prakasa göng irikang citta yeka nimitta ning atma mamanggih kamoksan, apan ikang sattwa gumawayaken rasa ning agama, sa utsahaha prayatna lumkasaken krama ning kasamyagjnanan. yan patmu ikang sattwa lawan rajah prakasa göng irikang citta, yeka nimitta ning atma para ring swargga, apa nikang sattwa mahyun magawaya hayu, ikang rajah manglakwaken sumiddhaken saprayojana ning sattwa, nahan yukti nikang rajah, milwawakang swargga kenḍit de ning sattwa. ya pwa nikang sattwa patmu lawan rajah tamah prakasa göng irikang citta yeka nimitta ning atma mangdadi manusa, apa nikang sattwa rajah tamah tan patut kirakiranya, tagawe hayu tanganaken dharmma punya yajña, ling nikang sattwa. krodhaglr angaku, ling nikang rajah. guhya lmeh, tamangan haturu juga, ling nikang tamah. mangkana kirakira nikang sattwa rajah tamah, tan patut mapalang pangan ya ta matangnyan tan hana kriya halahayu kadadi denya salah sawiji, nahan yukti nikang mangdadi manusa ika sang hyang atma, mangkana laksana nikang triguna rumaket irikang citta, ri pamangguh ning triguna lawan citta mtu tang buddhi, lakasana ning buddhi, buddhi tan pahingep, ikang buddhi ndan ahingep ya, kadi tan wruh ikang buddhi, ndan wruh ya kadi tanpa cetanekang buddhi, ndan cetana ya sangksepanya lngelnge sthita humideng lrmeng, menget ring halahayu jugekang buddhi, apa kari sinangguh buddhi ngaranya, e nihan pih, ganal ning triguna kacetana de ning citta, yeka sinangguh buddhi ngaranya, sangka ning buddhi mtu tangahangkara, ahangkara ngaranya ganal ning citta, ya ta sinangguh cetana mañetana ngaranya, apa dumeh yan mangkana, apa nikang cetana sangsaya ganal swabhawanya, ya ta matangnyan akweh prabheda ning tutur, aganal alit swabhawa ning tutur. 10

nihan kramanya kengetakna, bhatara mahulun makacetana sang hyang atma, sang hyang atma makacetana ikang citta, ika citta makacetana ikang ahangkara, ya ta inawesa de ning kriyasakti bhatara mapramana, ya ta sinangguh hurip ni hurip ngaranya kriyasakti bhatara pramana mwang pinakahurip ning ahangkara pinakahurip ning buddhi, ya ta matangnyan pramana ngaranika ahangkara waneh, apan mangku mamastuni ring hana lawan nahan, manglakasaken karyya halahayu juga guna nikang ahangkara mwang mangku sarwwadrbya, lingnya drbyangku bayungku sabdangku ingetku sarirangku, mangkana ling nikang ahangkara, ikang ahangkara lawan buddhi ya pramana wisesa ngaranya, apa dumeh ikang ahangkara lawan buddhi sinangguh wisesa ri denya sthiti humiḍeng tan polah, tuhun tutrmmatra lmeng menget ring halahayu jugekang buddhi, tuhun pinakaparanti jugeka hananya de ning ahangkara tri bhedanya, lwirnya, si waikrta si taijasa si bhutadi, nahan ya ahangkara. ahangkara si waikrta yeka buddhi sattwa, ahangkara si taijasa yeka buddhi rajah, ahangkara si bhutadi yeka buddhi tamah. 11

gawenya yeki wuwusen, ahangkara si waikrta yeka magawe manah mwang dasendriya, lwirnya, caksu srotra ghrana jihwa twak, nahan tang sinanggah pañcendriya ngaranya, wak pani pada upastha payu yeka sinanggah pañcakarmendriya ngaranya,
papinḍa nikang pañcendriya lawan pañcakarmmendriya yeka sinanggah dasendriya ngaranya, kasawlas manah, nahan gawe nikang si waikrta ahangkara. kunang ikang ahangkara si bhutadi yekagawe pañcatanmatra, lwirnya, sabdatanmatra sparssatanmatra rupatanmatra rasatanmatra gandhatanmatra. sabdatanmatra ngaranya tutupi talinganta kalih, hana sabda karngö, lit nikang sabda yeka sabdatanmatra ngaranya. sparssatanmatra ngaranya hana wayu madrs barat prahara kunang, marn pwekang wayu, lit nikang sumilirumersöng pakulit yeka sparssatanmatra ngaranya. rupatanmatra ngaranya duwegi kalasndhya sumurup sang hyang aditya kulwan, hana ta tejanira kawkas matramatra, lit nikang teja yeka rupatanmatra ngaranya. rasatanmatra ngaranya, kadyangga ning amangan saḍrasa, tlas pwamangan hana ta ya sesanya matra kawkas ring liḍah, lit nikang rasa yeka rasatanmatra ngaranya. gandhatanmatra ngaranya kadyangga ning ambung wangiwangi candanagaru kunang, lunghu tang wasa kweh rika hana ta ya sesa nikang gandha ring irung ya ta hinambung rinasan, lit nikang gandha yeka gandhatanmatra ngaranya. 12

sangka ring pañcatanmatra mtu ta ng pañcamahabhuta, akasa mtu saking sabdatanmatra, hawangawang huwunguwung tan pagamongan mweh awan laksananya sabda pinakagunanya. wayu mtu saking sparssatanmatra, ri wut pata barat prahara angulahaken laksananya sparssa pinakagunanya. teja mtu sakaring rupatanmatra, prakasa paḍa apanas pinakalaksananya rupa pinakagunanya. apah mtu sakaring rasatanmatra, amlrs laksananya saḍrasa pinakagunanya. prthiwi mtu saking gandhatanmatra, akasa ganal laksananya gandha pinakagunanya, ikang gandha tiga prabhedanya, surabhi asurabhi sa ca gandhasadharanah, surabhi nga awangi, asurabhi nga abo, sa ca gandhasadharanah ikang tan awangi tan abo nga, nahan ta laksana nikang prthiwi, yeka pamkas ning tattwa ganal, ikang prthiwi apah teja wayu akasa ya ta ginawe bhuwana de bhatara, arddha ruhur suminḍuhur matumpangtumpangan laksananya, ikang tattwa i ruhur pinakaguna de ning tattwa i sor. nihan laksananya, ikang akasa mungwing ruhur, tumut ta ng wayu,ya ta matangnyan ro guna ning wayu sabda sparssa. akasa wayu teja, ya ta matangnyan tiga guna ning teja sabda sparssa rupa. akasa wayu teja apah, ya ta matangnyan pat guna ning apah sabda sparssa rupa saḍrasa. akasa wayu teja apah prthiwi, ya ta matangnyan lima guna ning prthiwi sabda sparsa rupa saḍrasa gandha. 13

nahan laksana nikang pañcamahabhuta an pawor guna, ginawe anḍabhuwana de bhatara, lwirnya, saptaloka pamkas mungwang i ruhur, tumut ta ng saptapatala mungguh i sor, bhuwanasarira ngaranya, satyaloka munggw ing ruhur, i sornya mahaloka, i sornya janaloka, i sornya tapoloka, i sornya swarlloka, i sornya bhuwarlloka, i sornya bhurlloka. ndan ikang bhurlloka patimbuna ning tattwa kabeh, ngka ri bhurlloka saptaparwwata saptarnnawa saptadwipa dasawayu dasendriya, ngkana pwa samoha ngke bhurlloka ika kabeh. ikang saptaparwwata prthiwi raketnya ngke bhuwanantara. ikang saptarnnawa apah raketnya ngke bhuwanantara. ikang saptadwipa teja raketnya ngke bhuwanantara. ykang dasawayu wayu raketnya ngke bhuwanantara. ikang dasendriya akasa raketnya ngke bhuwanantara. nahan laksana nikang sarwwatattwa pasamoha ring bhurlloka. nihan ta ng saptapatala ngaranya, patala waitala nitala mahatala sutala talatala rasatala, i sor ning saptapatala balagarddabha mahanaraka, i sor nni mahanaraka ngkana ta nggwan sang kalagnirudra apwi dumilah sadakala, satusiwu yojana dilahnya mangaladalad sang hyang kalagnirudra apuy pinakangasa ning saptapatala, mangkana laksana ning anḍabhuwana, kapwa matumpangtumpangan kadi tala ning tawwan ikang tattwa ganal, samangkana kwehya gawe nikang ahangkara si bhutadi mula nika. 14

kunang laksana nikang ahangkara si taijasa, yeka kadi wayuh laksananya, tumulung si waikrta lawan si bhutadi milu magawe ekadasendriya lawan pañcatanmatra. kunang ikang ahangkara tiga laksananya mtu sakaring buddhi ya ta umupagama irikang sattwa rajah tamah, syapa karika mangupagama, sang hyang pramana ngaranira ganal sang hyang atma hana ring turyyapada, sira sang sinanggah sang hyang pramana ngaranira sira ta mangaku mamastwani lumkasaken kriya halahayu, kunang ikang buddhi manah ahangkara sḍeng pinakasadhana sang hyang pramana mangaku manglkasaken kriya karyya halahayu. mangkana laksana sang hyang pramana makasadhana ikang buddhi manah ahangkara. mapa kari bheda ning pramana lawan wisesa, nda nihan ro bhedanya, paḍa atma sira kalih kunang rwa bhedanya, kasor sang hyang pramana dening wisesa, wyapara ring halahayu sang hyang pramana, kunang sang hyang wisesa tan wyapara niskaryya nisprayojana nihungninga sira ring halahayu, kewala sthiti humiḍeng tan polah tan limbak tan laku tan hili, mangkana laksana sang hyang pramana wisesa maganalalitika, mangkana kang sinanggah pramana tahampih, paḍatma sira kalih, ikang pada juga maprabheda, saṃsaya ganal pinakinggwan sang hyang atma, ya ta tinut nikang atma, maganalalit swabhawa ning atma, ikang atma hana ring turyyapada ya yatah pramana wisesa kojaranira, mungguh pwa hyang atma ring jagrapada ya yatah pramana kojaranira munggah pwa sang hyang atma ring suptapada, nahan wastunya ngaran sang hyang atma sthiti humiḍeng ika ta sinanggah wisesa ngaranya, sang hyang atma wyapara mamastwani ika ta ng sinangguh pramana ngaranira, mangkana laksana sang hyang atma ring sapadapada pramana wisesa juga sira, mapa kari dumeh ikang ahangkara sinanggah pramana, ri denya n pinakasadhana ring mangku mamastwani juga sira, kunang nimitta ning kadi sapatiga arakwa lwir nikang buddhi, ikang ahangkara tiga prabhedanya maparanti rikang buddhi, ya tiga wrddhi manak limang puluh, limang puluh wrddhi manak satus, satus wrddhi manak sewu, sewu wrddhi manak tan kinawruhan wilangnya, yeka nimitta ning atma patmahtmahan. 15

mapa kari yukti nikang sattwa rajah tamah, an patmahtmahan maputera ring swargga naraka manusa triyak [tiryak]. sugyan mangkana linga sang para, ndan nahan pih, ikang ahangkara tiga prabhedanya, maparanti rikang buddhi, hana buddhi sattwa hana buddhi rajah hana buddhi tamah, ya ta tumutaken sakapti ning yoninya pinakajanmanya, wruh pwa sang nipunatattwa an mangkana kramanya, ya ta matangnyan kawruhan ikang ikang yoni mangdadyaken kamoksan lawan swargga nguni weh ikang janma waluywaluy, nihan kramanya kengatakna. yapwan ana buddhi sattwa tibra ri kalinga ning kaprajnan mungsing sastra molahaken kasamyagjnanan, sang hyang tripurusa yoni ning sattwa yan mangkana. yapwan ana buddhi sattwa tibra ri kalinga ning brata tapa yoga samadhi, pañcarsi yoni ning sattwa yan mangkana. yapwan ana buddhi sattwa tibra ri kalinga ning pujarccana japa mantra mwang kastutyan bhatara, saptarsi yoni ning sattwa yan mangkana. yapwan ana buddhi sattwa tan pangiwö halahayu, asih ta ya ring sarwwaprana, dewarsi yoni ning sattwa yan mangkana. yapwan ana buddhi sattwa tibra ri kalinga ning kawanin kadhiran kasuran, tan maling bhaya jiwita parityaga ring huripnya mangga umatya humalahaken sariranya makanimittasihnya bhaktinya, rasika tan wyamoha denyamawa prawrtti, kewala santacitta alilang juga manahnya, yan gaweyaken kadhiran kawanin, widyadhara yoni ning sattwa yan mangkana. yapwan ana buddhi sattwa tibra ri kalinga ning kalangön harsa ta yang rngö hunyahunyan mangdadyaken karnnamanohara langödrḍha ta ya ring higel kidung drha ta yacangkrama asing ramya mangö pinaranya harsa ta ya manon skar wangiwangi, gandharwwa yoni ning sattwa yan mangkana. yatika tan pakabhuminen de ning samyagjnana yan pangusir kamoksapadan, kunang ikang yogya pakabhuminen de ning kasamyagjnanan, kapanggihan ing kamoksan de sang rsi dewarsi saptarsi pañcarsi makadi sang hyang tripurusa, nahan ta ng buddhi sattwa kanistha madhyamottama. 16

buddhi rajah yeka wuwusen, hana buddhi rajah wineh sabda tan yogya, hanekang krodha kunang tapwan wnang mangret, tan kawtu ning wijil henya, makanimitta hana kalinga ning para ya ta matangnyan mwang juga, humikel swasariranya, sakaring seknya ri hatinya, drawa ta ya mijil matmahan tangis, danawa yoni ning rajah yan mangkana, hana buddhi rajah wineh sabda tan yogya, hanekang krodha kunang tapwan humneng juga ya mne ta ya ring kadohan, ujar ta ya, lingnya, adhikara denanu wnangaweh sabda tan yogya iryyaku kady angawangawedya sakarepnya kunang tapwan lmeh ring wada jugaku ahataku ring ayungku, daitya yoni ning rajah yan mangkana. hana buddhi rajah wineh sabda tan yogyakabahan kumter sariranya wawangaparaga, wakcapala hastacapala padacapala mangrik masinghanada mujaraken samenakeriya tan panggalrng linga ning para, raksasa yoni ning rajah yan mangkana. nihan tattwanya raksasa pinakahyang ning khadga gamangaman sang prabhu, salwir ning khadga warttamana pangalap hurip raksasa pinakadewatanya. daitya pinakahyang ning khadga pinakagamangaman wwang tani kadyangga ning luke prkul, salwir ning khadga pinakasadhana ning amijilaken kamopajiwa daitya dewatanya. danawa pinakahyang ning khadga pinakagamangaman sang wiku kadyangga ning pamiso kartri karayu danawa dewatanya. nahan tang buddhi rajah kanistha madhyamottama. 17

buddhi tamah yeki wuwusen, hana buddhi tamah tan harohara ring pinangan wareg de ning gangan saktes sge sawpel twak satahapan paritusta manahnya de nika, bhuta yaksa yoni ning yan mangkana, desanya munggwing no, pinakahyang ning dhatu munggwing linga pratima linggir pamujamujan. yapwanan buddhi tamah hapilih ring pinangan, tan samas ri kaharepnya, hadiding tan delanya irangirangan tan drpa tan sanggraha manahnya, yan amanggih bhoga atis ta ya manahnya, bhuta dengen yoni ning tamah yan mangkana, desanya mungnggwi wanglu karameyan, pinakadewa ning kayu banaspati. yapwanan buddhi tamah rampadan ya ta ring pinangan, tan apilih ri sakarepnya. salwi ning mangsa sinanggah campur pinanganya ika kabeh lamun wareg juga lingnya, bhuta kala yoni ning tamah yan mangkana, desanya mungwing sma wates pamanggahan catuspatha. yanan buddhi tamah tan anggamangan tan enak, ya ta nimittanya haruhara wkasan, kabarat katimur, tan pamalinghel wruh ta ya paracchidra ri drbya ning len, makanimitta yalmeh mangela hana dudu kalmah, drpa ta ya ring tañjakan, anguping juga talingnya an pangrengö bhoga, bhuta pisaca yoni ning tamah yan mangkana, desanyangambara, alakulaku ta polah, yeka sinangguh sasabawuh, ling ning loka. nahan tang buddhi tamah kanistha madhyamottama. ikang sattwa rajah tamah nimitta ning atma patmahtmahan, nahan kramanya kengetakna. 18
yan patmu ikang bhutayaksa lawan dewa dewarsi saptarsi pañcarsi tripurusa prakasa göng irikang buddhi, yeka nimitta ning atma mamanggih kamoksan. kunang ikang bhutadengen daityamatra patmu lawan daitya widhyadhara dewata prakasa göng irikang buddhi, ya nimitta ning atma mamanggih swargga. kunang irikang bhutakala patmu lawan raksasa gandharwwa prakasa göng irikang buddhi, yeka nimitta ning atma dadya manusa. kunang ikang bhutapisaca matmu lawan raksasa prakasa göng irikang buddhi, yeka nimitta ning atma tibeng naraka. kunang ikang yan bhutapisaca kewala prakasa göng irikang buddhi, yeka nimitta ning atma dadya triyak. nihan kengetakna wyangga muwah nimitta ning sang hyang atma mapalenan, sangsaya ganal sang hyang tripurusa, tripurusa ngaranya bhatara brahma wisnu iswara, sira ta pinakadisattwa, ika tang adisattwa yan pramada kurang yoga pañcarsi tmahanya, pañcarsi kurang yoga saptarsi tmahanya, saptarsi kurang yoga dewarsi tmahanya, dewarsi kurang yoga dewata tmahanya, dewata kurang yoga widyadhara tmahanya, widyadhara kurang yoga gandharwwa tmahanya, gandharwwa kurang yoga danawa tmahanya, danawa kurang yoga daitya tmahanya, daitya kurang yoga raksasa tmahanya, raksasa kurang yoga bhutayaksa tmahanya, bhutayaksa kurang yoga bhutadengen tmahanya, bhutadengen kurang yoga bhutakala tmahanya, bhutakala kurang yoga bhutapisaca tmahanya, bhutapisaca kurang yoga manusa tmahanya, ikang manusa tan kinahanan de ning jnanasakti apan patimbunan ing halahayu, hamaḍa dewata ring manusasakti limpad kalingan jugekang watek dewata, manusa kurang yoga triyak tmahanya, kalima prakara ning triyak, pasu ya dadi ring wanwa, mrga ya dadi ring alas, paksi ya dadi ring sarwwamer, mina ya dadi ring bañu, pipilika ngaraning sattwa manglakulaku ḍaḍanya, tani kinawruhan ngaranya waneh, yeka ikang sinangguh sarwwa kumilip ngaranya, sarisrpa kang lumakwi ḍaḍanya, sthawara ngaranya molah ring ungwan, lumaku kang nglurumur, nahan tmahan sang hyang atma yan manusa pramada kurang yoga. 19

sasharah, tan pahingan kasta kasyasih sang hyang atma, teher leleb hilang tan waluy ring jatinya, kadi tan pahiḍepan sang hyang atma, paḍa nira, kady angga ning wiji ning jawa sawiji, seseban ta ya para sewunen, lbokana ring samudra, atyanta juga kawanggihanya ring jatinya jawa, mangkana ta sang hyang atma, yan sampun dadi triyak, lehengan ya ikang dadi pasu, apan ya wnang pinakasadhana ning mangawe hayu, ikang dadi pipelika, kady angga ning tetek lintah, widat, warayang, hirispoh, salwira ning kinelikan de manusa, pisaningu yan kolahan, lawan ta waneh, ikang triyak, hana kinawedyan, hana kinelikan, mapa ta kalinganya, ikang karmma hala, kanistha, madhyamottama, hatingkah, apa ta kanistha ning magawe hala, ikang wong kaluputan dening krodhanya, dadi sahasa, capala, mangkana ta wyangamuktya pagawenya hala, ya ta tiba ning naraka, hentasnya sangkerika, yeka wineh dadi manusa de sang yamabala, tan paḍa rupanya lawan sang sadhu, yeka wikarajanma ngaranya, kahanan cheda, salwir ning cheda, makaphala ning kanistha dening gawenyala. 20

nihan ikang wwang, madhya denyagawe hala makanimitta dening kasyasihnya, tanana panganenya sanḍangenya, mangkana karananyagawe hala, lumaku maling parachidra ning drebya sang sadhu, sakarananya mangana, pjah pwa ya masurung ulahnya mangkana, dumunung ta ya ring naraka, hentasanya sangke naraka, wineh ta ya dadi triyak de sang yamabala, ndan ikang triyak kang wnang pinangan, wnang pinangan pinakasadhana ning agawe yajña tawur, wineh mangkana wasananya, nahan madhya ning phala ning gawenya hala. 21

nihan uttama ning gawenya hala, nda makanimittan dening ahangkaranya, dening lobhanya, dening mohanya, dening dambhanya mwang hirisyajna[nya dwng], tan pawanehan tuhu letuh ning jnananya, porapuri denya magawe hala, hamrang wong tan padosa, hangiwa tadol wong tan padosa, maweh larambek ing para, amangan paḍa ne wong haranya, ika ta janma mangkana kramanya, sakala juga kinelikan, kinarisyan, kinawedyan dening samanya manusa, saparanya hasing sakahananya juga pinalehinangluh, pjah pwa wwang mangkana, kramanya tan doh dumunung mari naraka, hentasnya sangke ngkana, wineh ta ya dadi triyak, de sang yamabala, nda nahan tmahanya, salwira ning triyak kinelikelikan, kinarisyan, kinawedyan dening manusa, yeka pinakajanmanya, nahan phala nika uttama ning gawenya hala, lewih wiparitanya, tan pasing kajanmanya sang hyang atma, pisaningu wruha ning kalinga ning dadinya, yapwan hana gamanya wnang tumakwanakna kalingan ing adhamanya ring sang panḍita. apa kari nimitta ning pañcatriyak, satingkah ning manusa magawe hala tiya, matangnyan pagawe ya para ring manusa, pagawe ya hirikang triyak. yan mangkana linga sang para, nda nihan pih pareng mijil ikang bhuwana, ikang pañcatriyak, tan ucapen ikang swargga naraka, nguniweh ikang sarwwajanma halahayu, an pinakasaji ning bhuwana gatinya, ikang swargga phala ning magawe hayu, ikang naraka phala ning magawe hala, hentasnya sangkerika, irika ta yan pangjanma triyak, apan ulihnyagawe hala, sangksepanya, saji ning bhuwana jugekang halahayu, umangkana mara kami ngke triloka, manghiḍep sukhaduhkha, laralapa, panastis, tuhapati, saji ning janma mangkana, nohan wogan, ya ta matangnyan tan hana kasangsaya mami, apan saji ning bhuwana kami de bhatara, mati mangjanma mwah, jatinya mangkana. 22

ndah ya tiki dona sang hyang tattwajnana, apan pinintonaken ri kita kamung para, ya ta matangnyan, ya ta maryya makajatinya mangkanekang rat, yan wruha kita rumase, rumengö, rasa sang hyang tattwajnana, yapwan enakatamwanira sang hyang tattwajnana, de nikang rat, yeka sangka ning tuturnya, gumawayakna rasa ning prayogasandhi, makasuluh tang samyagjnanan, makabhumyabrata, tapa, yoga, samadhi, yeka tamba ning atmasangsara. 23
ikang atma, ndya manghiḍep sangsara, kepwan ngweng rumase sang hyang tattwajnana, arah, apan sinanggu sthiti sang hyang atma hana ring turyyapada, tlas karuhun bhatara mahulun, sinangguh wyapi sira hana ring niskala, kriyasakti bhatara, umawesa ikang ahangkara, ikang ahangkara umawesa ikang wayu, ikang wayu ya ta sumusuki ng naḍi, ikang naḍi ya ta suksma ring sarira, ikang sarira ya ta manghiḍepañcagati sangsara, niyatanya juge bhatara, ikang manghiḍep sangsara, yan mangkana, milu dadi triyak. sugyan mangkana linga sang para, ndan taham pih, nahan drstopama kady angga ning apanḍe wusi, wusi ginawenya, ikang prabotaneka lwirnya, paran, palu, supit, kikir, asing wusi juga katunggalanya, mangkana tang wusi kati, ginawe khaḍga de sang panḍe, ikang khaḍga makweh lwirnya, ana khaḍga pinakagamangaman sang prabhu, ana khaḍga pinakagamangaman ing wong tani, ana khaḍga pinakagamangaman sang panḍita, ya yatah khaḍga juga kasangjnanya kabeh, yawat wusi malanḍep, tawat khaḍga juga kasangjñanya, tuhun gawenya juga dudu, ikang khaḍga haneng sang prabhu, kady angga ning curik, malalya sangkuh, pinakasadhana ning aprang mangalap huripaknanya, ikang khaḍga hana ring wong tani, kady angga ning luke, prekul, pinakasadhana ning amijilaken karmmopajiwa paknanya, ikang khaḍga hana ring sang panḍita, kady angga ning pakisi, kartri, karayu, pinakasadhana ning amiso, pangri paknanya, ndan khaḍga juga tumampuh ring halahayu, kunang ikang prabwat pih, tan milu ika tumampuh ring halahayu, tuhun pinakapagawe juga hananya, tlas karuhun sang panḍe, wyapi wyapaka juge sang panḍe, iccha ning manah sang panḍe juga, gumawe ikang wusi kati, sang panḍe juga wruhi tmahan ikang wusi kati, an makasadhana hiḍep nira, makapagawe ikang prabwat, ikang prabwat ta yan pagawe sang panḍe mohalaknekang prabot, yan humneng mararyyan sang panḍe umneng ikang prabwat, sthiti hana ri pakekesanya. 24

alihakna pwa talinga pangrengö, mangkana ta bhatara mahulun, hana wyapaka juga sira, cetananira juga, gumawaya kang sarwwajanma kangeh, an makasadhanekang kriyasakti bhatara, makapagawe ikang atma hana ring turyyapada, lawan ikang atma hana ring jagrapada, an gumawayekang atma hana ring suptapada, winehnira manghiḍepa pañcagati sangsara, sukhaduhkha, laralapa, panastis, tuhapati, sangksepanya, atmekang ginawe sangsara de bhatara. nihan kramanya kengetakna, bhatara mahulun maharepanon, wastu sakala, ya ta matangnyan iniccha nirekang atma, tunggal, apan aparo lwirnya sang hyang atma, ri kalanira iniccha de bhatara, an kinon sira mañetaneng pradhantattwa, ndan irika ta sang hyang maparo wkasan, hana wyapara, lawan tan wyapara, atma wyapara ngaranya, ri kalanira kinon mañetana ring pradhanatattwa de bhatara, mañetana ngaranya umyaparaken tutur sira, manghiḍep manganangen yeka sinangguh mañetana ngaranya. 25

atma tan wyapara ngaranya, bhatara mahulun mararyyan humnang, mari sira makon mañetana, humnang ikang atma mari mañetana, kadi lawan ikang dŗesta nguni, prabot sang panḍe, humnang ikang prabot, mangkana laksana sang hyang atma, mari sira kinon mañetana de bhatara, humnang sang hyang atma mari mañetana, kaiwalya sthiti humiḍeng tan polah, tan limbak, sira ta sinangguh atmawisesa ngaranya, sira ta bhatara dharmma ngaranira waneh, kunang kalanira wyapara mañetana, irika ta sira pramana ngaranira waneh, ikang atma sinangguh sang hyang pramana, lawan sang hyang atmawisesa, kewala sthiti hana ring turyyapada, kunang ikang atma hana ring jagrapada, ya yatah tunggalaksananira, kadi laksana ning atma hana ring turyyapada, kunang rwa bhedanya, aganal alit ika, atma hana ring jagrapada, apan cetana swabhawanya, cetana ngaranya, ganal ning atma hana ring turyyapada, ikang ingaranan citta, ikang karaktan dening triguna, citta ngaranya, tutur wyapara tan wruhing halahayu, ika tang tutur lawan citta, tunggal swabhawanya, citta ngaranya wyapara, tutur ngaranya ri kalanya sthiti humiḍeng tan polah, ikang atma hana ring jagrapada, tunggal tutur wyapara, lawan tan wyapara, bhedanya, ya yatah atma juga kasangjnanya, ikang atma pwa ginawe, wineh mangiḍep sangsara sukhaduhkha, ikang atma inaranan ahangkara, ya tika ginawe de bhatara, wineh matmahan sangsaya ganal, makaprabot ikang atma hana ring jagrapada, lawan ikang atma hana ring turyyapada, yeka pagawe de bhatara, nahan kramanya kengetakna, ikang atma inaranan ahangkara sang waikreta, yeka ginawe de bhatara, lawan dasendriya, kunang ikang atma inaranan ahangkara sang bhutadi, yeka kinon de bhatara mangaweya pañcatanmatra, lawan pañcamahabhuta, kunang ikang manah, manah ngaran hiḍep, ikang hiḍep ya ta winimbana muwah, an matmahan ya tatma lawelawö, atma lawelawö ngaranika atmapariwara, atmapariwara ngaranya, nihan lwirnya, atma, paratma, niratma, antaratma, suksmatma, yeka pañcatma ngaranya, hiḍep katunggalanya, yeka sinangguh pamkas ing atma ganal, yeka tumampuh ring halahayu gatinya, tan pahusan tmen. 26

sakatopamaṃ pradhanaṃ puruso wrsabhopamah,
isasarathisaṃyuktaṃ jagat bhramitacakrawat. 27

ikang pradhanatattwa yangken sakata, ikang atma yangken wrsabha, isah, bhatara iswara sira kangken sarathya, humregikang atma manghirid gritan, jagat bhramitacakrawat, ikang jagat kangken cakra ning gilingan gumulunga puteran ring dewata, manusa, triyak, makanimitta dening karmma halahayu, mangkana wkasan ing atma ganal, yeka khaḍga kangken gawe sang panḍe, kunang ikang atma wyapara hana ring turyyapada, yeka kangken supit sang panḍe, kunang ikang atma tan wyapara ya ta kna parena sang panḍe, ikang atma hana ring jagrapada, lawan ikang atma hana ring turyyapada, tan milu tumampuh ring halahayu, tlas karuhun bhatara mahulun, wyapi wyapaka juga sira, iccha ning manah rata juga, gumaway ikang sarwwajanma, ndya tikang atma sinangguh manghiḍep sangsara, ya ta linga sang para, sinangguh ta yatma manghiḍep sangsara, ndan ikang atma inaranan ahangkara sang waikrta, yeka buddhi sattwa, yeka manghiḍep lara. ikang atma inaranan ahangkara sang taijasa, yeka buddhi rajah, yeka manglare, ikang atma kinaranan ahangkara sang bhutadi, yeka buddhi tamah, yeka pinakalara. 28

nihan ta prabhedanyatma manghiḍep, lawan ikang atma tan panghiḍep, apa pwa ya matangnyan bhatara dharmma, an sira pinakahurip ning sarwwajanma kabeh, tlas karuhun bhatara mahulun, an sira rakwa tumut mangjanma, pinakahurip ning hurip. singgih bhatara hana pinakahurip ning wong kabeh, ndan utaprota laksananira, uta ngaranya, kady angga ning apuy hana ri ngeseyen, pringampyal kayu, kunang tan kinawruhan, tan katon juga hananya, wyakta tan wyakta juga hananya, apa kalinganya, ya ta ngara ngeseyeng wangi rikang pringampyal kayu, niyatanyan tan pamijilaknapuy, kang yogya mijilaknapuy, apanegeh kang kinahanan de ning apuy. 29

alihakna talinga pangrangö, kadi mangkana ta bhatara, an hanerikang sarwwajanma, wyakta tan wyakta, juga hana nira hana ring rat kabeh, nahan panghinggan ri wyakta sira lawan tan wyakta sira, hana ri wwang kabeh, haywinucap ikang janma kabeh, samanya, ikang tan ana tuturnya, mwang tan ana kaprajnaniriya, ika sang kinahanan dening tutur lawan kaprajnan, sira caritaken rumuhun, sang sampun wruh ri kalinga ning prayogasandhi, nguniweh sira sang lumkasaken tapa, brata, yoga, samadhi, apa kapo matangnyan meweh ika sang wnang manuwuhaken jnana, lawan wnang tumamwa yogawisesa, kenakanya, sabarinya, wruha ring yoga, samadhi, lumkasaken tapa, brata, yoga, samadhi, wnang sira sakamakama, wnanga ta sira juga lumkasaken prayojana sira, sakweh nikang lumkasaknikang prayogasandhi, tan kewehana juga sira, apan paḍa kinahanan ngaranya, sira dening atmawisesa, meweh ikang sang nginandelan dening bhatara. prota kapwa panghinggananta, kady anggan ing teja ning manik, mangekadesa hananya, ndah mangkana bhatara, ikonggwan sira mangekadesa, adhyatmika juga sang hinandelan teking bhatara, ndatan padonikang brata, tapa, yoga, samadhi, gawayakna, apan tanana ngaranika, ikang inarparp yan mangkana, apan meweh sira sang kinahanan dening atmawisesa, meweh sira sang hinandelan dening bhatara, ling ning agama. sugyan mangkana ling sang para, taham pih, gawayakna hikang brata, tapa, yoga, samadhi, apa nikang samadhi, iswarapranidhana, yeka karddhanan sang hyang atmawisesa, nguniweh karddhanan bhatara, yapwan sing lot humabhyasa, ikang samadhi, iswarapranidhana, tan pangucapalawas, masengkera hurip sira humabhyasa ikang samadhi, ri janmanira sohah [sowah], matutur juga sira humabhyasa ikang samadhi, ndah mangkana ta tuturan pih bhatara, hinandelan sira dening bhatara, sangksepanya, inarddhana sinamadhi tka bhatara, an hana sira irikang wong, ya tan hinarddhana, tan sinamadhi, sira tan hana irikang wong, nihan tang pañcatriyak, an sinangguh mari pawak bhatara dharmma, apa pwa matangnyan wiparita tanana tuturnya, kenakanya, matutura ta ya ring prayojana kabeh, yan tuhu ya kinahanan dening bhatara dharmma, apa pwa gawenya tan mangkana, yeka panghinganan panganumanan, an lalis bhatareriya, kewala tan kinahanan juga, gatinya dening atmawisesa, ikang atma ndya pwa hana ngkana, ikang atma lawelawö juga, ika pamkas ning atma ganal, ikang hinaranan hiḍep, ya ta matangnyan ikang wayu, sabda, hiḍep juga hana ngkana, wayu pinakahuripnya, ikang hiḍep inanangenangenya, ikang sabda pinakaswaranya, ya ta matangnyan tan pawastu sabda ning triyak, apan tan kinahanan dening atmawisesa, kunang ikang wayu, sabda, hiḍep juga larih wratta, ika ring triyak magöng admit, tka ring sthawara, janggama, trna, taru, lata, gulma, tanana katunan wayu, sabda, hiḍep, ikang sattwa tumuwuh, kunang ikang sang hyang atmawisesa, kewala juga sira tan hana ngkana, ndan lupa laksananya ring janma samangkana. 30

ikang wayu, sabda, hiḍep juga larih wartta, hana ring janmamanusa, mwang kanistha, madhyamottama, tanana katunan wayu, sabda, hiḍep, kunang sang hyang atmawisesa, adhyatmika juga sira, sang kinahanan atmawisesa, tlas karuhun bhatara mahulun, mangarccaneriya, ikang janmamanusa kabeh, tan paḍa lawan rowangnya, hana tutur, hana lupa, hana prajnan, hana pungguh, apa ta linganya, sang kinahanan dening atmawisesa, prajnan atutur, apa nikang atutur ngaranya, yeka pangawak sang hyang wisesa, mangke ring manusa ika ta sang prajnan, lawan sang matutur kanistha, madhyamottama, ika lwirnya, apa dumeh yan mangkana, apa kanistha, madhyamottama, laksana sang hyang atma, sang kumalalan ring manusajanma, ya ta matangnyan kanistha, madhyamottama, lwir nikang sang matutur lawan prajnan, kunang sang apunggung lawan sang malupa, akḍik tuturnya, kanistha ning kanistha, ikang atma ngaranika yan mangkana, nahan yukti nikang janma kanistha, madhyamottama, denyamanggihaken kaprajnan lawan tutur, apa nikang atma kanistha, madhyamottama, laksananya hana ring jagrapada, lawan hana ring turyyapada, yan atma uttama, hana rikang wwang, uttama nikang wwang, umangguhaken kaprajnan lawan tutur, yan madhyekang atma, hana rikang wwang, madhya denyamanggihaken kaprajnananya, lawan tutur, kunang yan kanistha ning atma, hana rikang wwang, kanistha denyamanggihaken kaprajnan lawan tutur, kunang yan kanistha ning kanistha ikang atma, hana rikang wwang, tan hanekang kaprajnan lawan tutur, yan mangkana, tuhun tuturmatra juga, hana rikang wwang, yan mangkana, kunang sang kinahanan dening atmawisesa, uttama, sira ta meweh atma uttama, atmawisesa ngaranira. ndan taham pih, ade ikang paḍa tang waang kinahanan dening atmawisesa, tanana katunan wisesa ika ngaranya, ikang rat kabeh, kunang sor lewih lawan rowangnya waneh, ikang subhasubhakarmma dumadyaken ika, yeka nimitta ning janma kanistha, madhya, uttama, lwirnya. 31

mangkana linganta sang para, singgih sabda sang para, ikang sukhaduhkha ngaranika, ndan ikang subhasubha ngaranira, ikang prajnan lawan punggung, ikang tutur lawan lupa, yeki carita gumulun, apa pwa nimittanya, hana prajnan kinahanan dening tutur, ndan kasyasih juga ya, tan kinahanan dening wibhawa, nguniweh yan wikarakara kunang, ikang janma mangkana, ndan tutur lawan kaprajnan, tan sah juga sakeriya, yeka pinakadrbyanya, pinakamasmaniknya, hana ta ya janma salisuh amanggiha wibhawa t(e)her, tan hana tuturnya, tan kinahanan dening kaprajnan, apan dumadyaken ika, ade ika sengguhan subhakarmma dumadyakenika, sangksepanya, larangan juga sang kinahanan dening atmawisesa, sang prajnan, sang matutur, sang kinahanan dening atmawisesa, nihan panglangganerikang rat kabeh, tanana wehana punggunga lawan ikang lupa, kewala tutur, kaprajnan lwirnya kabeh, ikang janma kanistha, madhya, uttama, tan hana lupa lawan punggung, matutura prajnan juga kenakanya kabeh, apan paḍa hinakdelan, paḍa kinahanan dening atmawisesa, linganta kamung para, apa pwa gawenya tan mangkana, nahan panghinggana manganumanan, an meweh ika sang kinahanan dening atmawisesa, sang hyang atmawisesa ngaranira, prajnan makawak tutur prakasa juga, nahan panganumanan, ikang janma lupa lawan punggung, tan kinahanan dening tutur lawan prajnan, tan kinahanan juga gatinya dening atmawisesa. ikang atma ndya pwa hana ngkana yan mangkana, ikang atma wyapara, kang hana ring jagrapada juga, ikang iranan dita, sinangguh mangaku, mamastwani tan kawastwan, manon tan katon, yeka hana ngkana, ya ta matangnyan wruh mamastwani ring hana lawan tan hana, nahan kalewihnya sangkeng triyak, tuhun tan wruh ta ya ring wisesa, tan wruh ta ya ring sastragama, ya ta sinangguh janma iwengiwö ngaranya, katmu juga sang tutur denya, kahaḍangaḍang [kahaḍanganan Ed] juga kang hayu denya, apan tan pasuluh sastragama. kunang yan hana janma katon prajnan, widagdha wruh mangaji, ndan kanistha denyamanggihaken kaprajnan lawan tutur, ya taya ta [ya yatah Ed] juga tan kinahanan dening atmawisesa, atmeha ndya pwa hana ngkana, ikang atma wyapara hana ring turyyapada, sira hana ngkana. 32

kunang yan hana janma katon prajnan, widagdha wruh mangaji tan hana kolih nira ring guna kabeh, samyagjnana kunang sira, uttama dening atmawisesa kaprajnan, ndan irika ta yan atmawisesa, hana ngkana ya mangkana, atmawisesa ngaranira, bhatara dharmma, bhatara dharmma ngaranira ikang atma tan wyapara hana ring turyyapada, ikang sinangguh prajnan, pinakatutur prakasa, sira ta hana ngkana yan mangkana. kunang yan hana janma katon limpad, denya umangguhaken sakeng uttama nira, ikang ptajnan lawan tutur, limpad sakeng uttama ngaranira, wnang sira wyaping wyapaka ring sakala, wnang ta mamintonaken panganumanan, makadrbya kastaiswaryyan, mwang manemwanen yogawisesa, uttama de nira umangguhaken kayogiswaran, ndatan wnang rinatwan, bhataradipramana hane ngkana mangkana, bhataradipramana ngaranira bhatara sadasiwatattwa, nguniweh bhatara dharmma, sira ika hana ngkana yan mangkana. 33

nahan prabheda ning atma, an kanistha, madhya, uttama, sang kumahanekang janma tutur lawan prajnan. ika puhun ngwang rumaseng ikang tattwa harah, ikang sinangguh atma lawelawö, juga dumampuhing halahayu, ling ning atma, kunang ikang atma hana ring jagrapada, lawan ikang atma hana ring turyyapada, yeka tan milu tumampuh ring halahayu, ling ning tattwa tambeyan, mangke pwa ya sira pinakatma, sama kanistha, madhya uttama, de nira umangguhaken tutur lawan kaprajnan, nguniweh ikang punggung lawan lupa, tlas karuhun de nira umangguhaken limpad, sakeng uttama, ikang tutur lawan prajnan, niyata masarira juga bhatara yan mangkana, nguniweh ikang atma hana ring jagrapada, lawan ikang atmahana ring turyyapada, niyatanyan masarira juga yan mangkana, yawat masarira, tawat milu ika tumampuh ri halahayu yan mangkana. sugyan mangkana ling sang para, ndan taham pih, nihan drstopama, kady angga ning manik sphatika, sampun kinaniscaya nikang manik sphatika, an kewala suddha putih nirmmala, nirawarana tan patalutuh, juga warnna nikang manik, tathapinyan mangkana, raktakna ta ya irikang warnna, yan abang, yan akuning, ika ta yan masalin warnna ikang manik, an makawarnna unggwanikang rumaket uga kawkasan, yeka sinangguh karaktan lawan koparnggan ngaranya, kadi hilang warnna nikang manik kahiḍepnya, tlar juga warnna nikang manikang tan patalutuh, makanimitta pasahakna ikang manik lawan ikang warnna, ndan irika ta yan katon suddha putih nirmmala, ikang manik wkasan, muwah ri jatinya nguni, ikang warnna raktanya nguni, hanekawakanya jugeka wkasan. 34

alihakna talinga pangrengö, iwa mangkana ta sang hyang atma hana ring jagrapada, lawan sang hyang atma hana ring turyyapada, an pinakatma ning rat kabeh, ndan alit acintya suksma juga sira, nirmmala, suddha putih, nirawarana, tan patalutuh, makawak sphatikajnana juga sira, ya ta matangnyan tan kna sira ring halahayu, katunu sira tan gseng, kaḷbu ring bañu sira tan teles, apan alit suksma juga sira, acintyangandelitan kandelan juga sira ring jnana, manon tan katon, mangaku tan kaku, mamastwani tan kawastwan juga sira ring wayu, sabda, hiḍep, tuhun sira koparnga juga sira de nikang inungwanira, sarupa nikang inungwanira pinakarupa nira, ya ta matangnyan kadi milu kahiḍepanira, tumampuh ring halahayu, kintu taha, ikang atma hana ring suptapada, lawan ikang atma hana ring swapnapada, juga manghiḍep sangsara, aputeran ring dewata, manusa, triyak, tumampuh ring halahayu, suptapada ngaranya ikang lupa, yeka nimitta ning atma maturu, swapnapada ngaranya para ning atma mangipi, ikang atma hana ring suptapada lawan ikang atma hana ring swapnapada, yeka sinangguh atmasangsara ngaranya, kintu tunggal sang hyang atma, ika juga paḍa maprabheda sangsaya ganal, atma mahḷt ikang sarwwatattwa, an matumpangtumpangan, kadi tala ning tawwan laksana sang hyang atma, hana ring sapadapada, atma ya ta inaranan hanak ning tawon, umungguh irikang pada, nihan laksana sang hyang atma kengetakna, yan umungguh sira ring swapnapada lngelngö hiwengiwöng juga laksananya, hanan tuturarddha wurawutan waspada, kadi laksana ning mangilo ring wwai juga tumon ing wastu hana lawan tan hana. mungguh kapo sira ring suptapada, alupa wiparita tan kahanan tutur, kadi hilang juga sang hyang atma lungha tka, apan sinaputih kalanidra. mungguh kapo sira ring jagrapada, awas pratyaksa sang hyang atma tumon ikang wastu hana lawan tan hana, apan prakasa nirmmalekang pada, teja nira warnnakasa, ahning anilanila, mangkana laksana sang hyang atma hana ring jagrapada. suptapada, swapnapada kakasut kahmu juga dening pradhanatattwa, sahingan ing pradhanamangku, kahasan kalanglangan kaparacakra juga dening manah mangalpana, kalangkahan ya dening rahina wngi, kunang prabhedanya, ikang satahun ring manusa, yeka pinakawngi ring jagrapada, ikang rowlas tahun ring manusa, yeka pinakalek ring jagrapada, ikang sayuga ring manusa, yeka pinakatahun ring jagrapada, ikang caturyyuga ring manusa, yeka satapa ring jagrapada, nahan laksana sang hyang atma hana ring jagrapada. umungguh kapo sira ring turyyapada, enak tmen waspada sang hyang atma tumon ring sarwwawastu, hana lawan tan hana, enak enak de nira kumawruh irikang atitanagatawarttamana apan prajnan makawak tutur prakasa sira, teja sira suddha putih, kadi warnna ning manik sphatika, alilang ahning tan patalutuh, tmenityakala juga, rahina sada tan kahḷtan tiking rahina wngi, nguniweh tan katkan dening manah mangalpana, kunang ikang jagrapadam pih, kederan kaparacakra dening manah mangalpana, nahan kasor nikang jagrapada dening turyyapada, apan alit iking turyyapada, kewala juga tatan katnan dening hiḍep, tlas karuhun ikang turyyapada, apan unggwan bhatara mahulun ikang turyyantapada, teja nira prakasa dumilah, kadi teja ning aditya sewu, tuhun tan apanas bhedanya, niwala prakasa paḍang juga, rahina sada nityakala/ tan kahḷtan dening rahina wngi, kinahanan sira dening arwwajna sarwwakaryyakartta, jnanasakti, wibhusakti, prabhusakti, kriyasakti, nahan kasor nikang turyyapada, dening turyyantapada, kintu paḍalitnya, mwang suksmanya, ya ta matangnyan kewala juga tan katkan dening hiḍep, sangksepanya, sang manemwaken yogawisesa juga tka ngkana. 35

apa pwa matangnyan tan wanang inucapaken ri hana ning turyyapada mwang turyyantapada, apan tan katkan dening hiḍep, apan ikang hiḍep ngaranya, yeka pinakasadhana ning mangawruhi, wastu hana lawan tan hana, sugyan mangkana linga sang para. ya ta don ikang pramana tlu, pinakasuluh mata kita kasamyagjnana, pramana tlu ngaranya, pratyaksapramana, anumanapramana, agamapramana, ika tang wastu ganal, sakaton sakarngö, sakagamel dening tangan, yeka kawnang dening pratyaksapramana. kunang ikang suksma kadi laksana ning turyyapada, yeka kawnang dening anumanapramana. kunang ikang paramasuksma kadi laksana nikang turyyantapada, yeka kawnang dening agamapramana. nahan laksana nikang pada, maganal alit, ya ta tinut ikang atma, maganal alit swabhawa ning atma. ikang atma hana ring jagrapada, yeka kuminnin kempening atma hana ring suptapada, lawan ikang atma hana ring swapnapada, yapwan enak papisa nika mara ring jagrapada, mulih ta sira maring turyyapada, enak pwandel nira ring turyyapada, mulih ta sira maring turyyapada, nahan laksana sang hyang atma hana ring suksma ika kabeh. 36
utpatyakna pwa sira, ring janma samangkana, sang hyang atma ring prthiwi, umandeli ring bhuwanasarira, wyapaka pwa sira ring saḍrasa, sari ning pañcamahabhuta, prthiwi, apah, teja, wayu, akasa, yeka mamijilaken saḍrasa, nahan lwirnya, amla, kasaya, tikta, katuka, lawana, madhura. amla nga asem, kasaya nga sepet, tikta nga pahit, katuka nga apḍes, lawana nga asin, madhura nga manis. nahan sinangguh saḍrasa ngaranya, yeka ngaraning purwwa ning amuwuh sarira, kapingrwa ning amuwuh sarira, ikang saḍrasa pinanganinginum dening lakilaki, hanakbi, sari nikang pinanganinginum, yeka matmahan rah daging gajih, kapingtiga ning amuwuh sarira, sari nikang rah daging gajih, ya tika matmahan kamaratih, yeka pinakapanggihaken dening raga, yeka mangdadi muwah, yekakweh ikang kama sakeng ratih, yeka dadi lanang, yan akweh ikang ratih sakeng kama, yeka dadi wadon, yapwan samakweh ikang kama lawan ratih, yeka dadi kḍi, walawadi kunang, kunang ikang kama, yeka dadi tahulan, hotot, puhun wulu, ikang ratih, yeka matmahan rah daging gajih, nahan wyakti nikang pañcamahabhuta, mula ning sarira samangke, wyaktinya, prthiwi pinakakulit, apah pinakarah, teja pinakadaging, wayu pinakatahulan, akasa pinakasumsum. ikang pañcatanmatra, tmahanya, sabdatanmatra dadi talinga, sparssatanmatra mangdadi kulit, rupatanmatra mangdadi mata, rasatanmatra mangdadi liḍah, gandhatanmatra mangdadi irung, yeka sinangguh pañcagolaka ngaranya, tumambeh tang anḍabhuwana, saptapatala, saptabhuwana. saptabhuwana ngaranya, bhurlloka wtang bhuwarlloka hati, swarlloka ḍaḍa, tapoloka gulu, janarlloka ilat, maharlloka irung, satyaloka mata, nahan sinangguh saptabhuwana ngaranya. saptapatala ngaranya, patala silit, waitala pupu, nitala tur, mahatala wtis, sutala paglangglangan ing [Ed paglangaking] suku, talatala wahakanging talampakan, rasatala ḷpaḷpanya i sor, nahan tang sinangguh saptapatala ngaranya. 37

nahan tang sinangguh anḍabhuwana ngaranya ring sarira, ikang janma samangke, mandel tang saptaparwwata, gumulak lumimbak sang saptarnnawa, ḷmeng sumneng tang saptadwipa, umiri tang dasawayu ring naḍi. saptaparwwata ngaranya, wungsilan gunung malyawan, palitalitan gunung nisedha limpa gunung gandhamadana, paruparu gunung malayamahidhara, ampru gunung trisrngga, hati gunung windhya, pusuhpusuh gunung mahameru, nahan sinangguh saptaparwwata ngaranya, saptarnnawa ngaranya, mutra tasik tok, rah tasik kilang, aringet tasik asin, gajih tasik miñek, idu tasik madhu, sumsum tasik susu, utek hasik wahan, nahan sinangguh saptarnnawa ngaranya. saptadwipa ngaranya, tahulan jambudwipa, hotot kusadwipa, daging sangkhadwipa, kulit salmalidwipa, gulu gomedhadwipa, kukus puskaradwipa, untu, krauñcadwipa. naḍi ngaranya, lyang ning hotot, bungkahnya, i sorr ing nabhi, minḍuhur ta ya tkeng pusar, hana ta pangumalang kwehnya sewu witung wuluh ro, ana ta ya naḍi wisesa kwehnya sapuluh, lwirnya, iḍa, pinggala, susumna, gandhari, hasti, jihwa, pusa, alambusa, kuhuh, sangkhini. iḍa ngaranya ikang naḍi tngen, awan ing skul wruh sma lunglangan tkeng ḷt, pinggala ngaranya ikang naḍi kiwa, awan ing wway wruh sma lunglangan tkeng huyuhuyuhan, susumna ngaranya ikang tngah, hawan ing wayu amatlu, gandhari ngaranya pasimpangan ing naḍi, hawan ing wayumaring tutuk, maring mata, maring irung, maring talinga, mari wunwunan, hasti ngaranya pasimpangan ing naḍi, hawan ing wayu tkeng sarwwasandhi, wruh sma lunglangan tkeng kulit, puhun wulu, jihwa ngaranya pasimpangan ing naḍi, hawan ing wayu tkeng pusuhpusuh, pusa ngaranya pasimpangan ing naḍi, hawan ing wayu tkeng paruparu, alambusa ngaranya pasimpangan ing naḍi, hawan ing wayu tkeng hati, lawan ampruh, kuhuh ngaranya pasimpangan ing naḍi, hawan ing wayu tkeng limpa, sangkhini ngaranya pasimpangan ing naḍi, hawan ing wayu tkeng wungsilan mwang tkeng palitalitan, nahan tang sinangguh dasanaḍi ngaranya. 38

kunangaraning wayu wuwusen, lwirnya, prana apana samana udana wyana. wayu si prana haneng pusuhpusuh i ḍaḍa hinganya, umadi manglakwan wayu kabeh, pinakajiwa, pinakoswasa paknanya. apana ngaranya, ikang wayu haneng huyuhuyuhan, umawasari ning pinanganinginum, matmahan kama ratih, ampasnya dadi tahi huyuh, sari ning inambung, matmahan rhakumbel. udana ngaranya, ikang wayu haneng wunwunan, angulahaken mata, lawan tutuk paknanya. wyana ngaranya, ikang wayu haneng sarwwasandhi, angulahaken sarira mwang humawas tuha pati paknanya. samana ngaranya, ikang wayu haneng hati, uumawasari ning pinanganinginum, matmahan rah daging hampru, yeka sinangguh pañcawayu ngaranya. sapuluhnya nihan, lwirnya, naga, kurmma, krkara, dewadatta, dhanañjaya, wayu si naga, magawe matöb [Ed wateb], ikang wayu si kurmma, magawe kter, klut ing sarira, ikang wayu si dewadatta, magawe ngob paknanya, ikang wayu si krkara, magawe wahin paknanya, ikang wayu si dhanañjaya pinakasabda paknanya. nihan sinangguh dasawayu, kintu sawlas kweh nikang wayu, gawenya juga sapuluh, yeka nimittanya sinangguh dasawayu. 39

tlas mangkana, humandel tang atma lawelawö, lwirnya, atma, paratma, antaratma, suksmatma, niratma. atma ikang hiḍep munggw ing hati, pinakapangangenangen paknanya. paratma ikang hiḍep munggw ing mata, pinakapanon paknanya. antaratma ikang hiḍep munggw ing wunwunan, pinakapantara ning tanghi lawan turu paknanya. suksmatma ikang hiḍep munggw ing talinga, pinakapangrengö paknanya. niratma ikang hiḍep munggw ing kulit, pinakapangiḍep paknanya. nahan yang sinangguh pañcatma ngaranya, iḍep katunggalanya, tumambeh tang dasendriya, lwirnya, srotrendriya haneng karnna, ya karana ning atma pangrengö sabda halahayu. twagindriya haneng kulit, ya karana ning atma manghiḍep panastis, mangrasa ni sinanḍang hana saḷmbut. caksurindriya haneng mata, ya karana ning atma manon rupawarnna. jihwendriya haneng liḍah, ya nimitta ning atma mangrasa saḍrasa. ghranendriya haneng irung, ya karana ning atma mangmbung gandha, abo lawan awangi. wagindriya haneng tutuk, ya karana ning atma panabda, amastwani hana lawan tan hana. panindriya haneng tangan, ya karana ning atma manggamal. padendriya haneng suku, ya karana ning atma lumaku. paywindriya haneng ḷt, ya karana ning atma mangintut, mangising. upasthendriya haneng naga purus, ya karana ning atma masuklaswanita. nahan raket nikang dasendriya ring bhuwanasarira, tumambeh tang buddhi manah ahangkara, ikang buddhi, ya pinakasadhana ning atma pangenangen. ikang manah yeka pinakasadhana ning atma pamikalpa, mangrupaka. ikang ahangkara, ya pinakasadhana ning atma pangaku drbya, mwang pinakasadhana ning atma paḷkasaken kriya halahayu. ikang buddhi manah ahangkara lawan dasendriya, ya sinangguh trayodasakarana ngaranya, tumambeh tang triguna, sattwa rajah, tamah. 40

sang hyang tripurusa, purwwa ning umandel, brahma ring hati, wisnu ring ampru, iswara ring pusuhpusuh. andel ning pañcarsi nihan, sang kusika ring kulit puhun wulu, sang gargga hana ring rah daging, sang maitri ring wuduk, ring hotot, sang kurusya ring tahulan, ring sumsum, sang prtañjala [Ed. em. wrttañjaya, sic] ring tumpuk ning sarira. andel ning dewarsi nihan, sang hyang maheswara ring wungsilan, sang hyang rudra ring daleman, sang hyang sangkara ring limpa, sang hyang sambhu ring hunḍuhunḍuhan, sang hyang sadasiwa ring huyuhuyuhan, sang hyang paramasiwa ring ḍaḍa. andel ning saptarsi nihan, aditya ring mata tngen, soma ring mata kiwa, anggara ring talinga tngen, budha ring talinga kiwa, wrhaspati ring irung tngen, sukra ring irung kiwa, saniscara ring tutuk. andel ning dewata nihan, hyang indra ring ḍaḍa, hyang yama ring tangan tngen, hyang waruna ring walakang, hyang kubera ring tangan kiwa, hyang waisrawana ring madhya. andel ning widyadhara, gandharwwa nihan, citrasena pinakakawanin, citranggada pinakakasuran, citrarasa pinakakadhiran, gandharwwa pinakasanta, pinakatrpti, pinakaramya, pinakaharssa pinakawijah, pinakakalangön, nahan andel ning sattwa. O.

andel ning rajah nihan, danawa pinakakrora, pinakaglis, pinakapanasdaran. daitya pinakakrodha, pinakagleng, pinakasungsut. raksasa pinakamoha, pinakadambha, pinakirsya, pinakacapala, pinakasahasa. nahan andel ning rajah. O.

=andel ning tamah nihan, bhutayaksa pinakalapa, pinakanglih, pinakawarg, pinakamtah, pinakawer. bhutapisaca pinakaluhya, pinakalmeh, pinakakalusa, pinakarip, pinakaturu, pinakapunggung, nahan andel ning tamah. handel pada nihan, ikang jagrapada, yeka nimitta ning atma matangi matutura mangke ring manusa. ikang suptapada, yeka nimitta ning atma maturu. ikang swapnapada, yeka nimitta ning atma mangipi, mangampelu mangke ring manusa. nahan andel ning pada. 41

kunang pradhanatattwa, yeka pinakawak sang hyang atma, ambek ngaranya, mangke ring manusa, ikang ambek, yeka pinakawak sang hyang atma, mangke ring manusa, pinakatma hana ring sarira samangke, angga pwa ngaraning sarira, ambek pwa ngaraning pradhanatattwa, ikang ambek lawan sarira, yeka sinangguh anggapradhana ngaranya mangke ring manusa, ya karana ning ambek pasaṃmoha ning halahayu, mtu akeng ambek juga halahayu, sukhaduhkha bhinukti dening manusa, mijil sangkeng ambek juga yan pamisaya, makasadhana dasendriya, makadwara ikang dasamargga, mahasta ya ring anḍabhuwana mamisaya, menget pwa ya sang nipunatattwa [trigunatattwa?], mangkana kramanya, ya ta matangnyan ikang dasendriya wateken sawisayanya, ulihakna maring ambek, ikang ambek waluyakna pramana, sang hyang pramana, muwahadharmmawisesa, dharmmawisesa, muwaha antawisesa, antawisesa, waluyakna anantawisesa, umapa dening umaluyakna sira ring anantawisesa, ya donikang prayogasandhi, ni kawruhan de sang yogiswara, ika tang prayogasandhi, tan wnang ya tan pakasuluh samyagjnana, para ta dening kumawruhakna prayogasandhi, ya tan pakanimitta samyagnana, tan wnang ika ya tan pakabhumi brata, tapa, yoga, samadhi, sangksepanya, makabhumi brata, tapa, yoga, samadhi, makasuluh samyagjnana, makasadhana prayogasandhi, sira juga sang wnang tumkani kawisesan bhatara, kady anggan ing hru pinanahaken, sampun ing laras, abnera juga tampuhnya, hana pwa wong amanahken hru tanhing bhatara, tan abnera lakunya, ana saranguntit laku nikang hru yan mangkana, luputinujunya, kalinganya, hana sira sang amanggihaken ikang brata, tapa, yoga samadhi, lumkasaken ikang prayogasandhi, an mangkana luputing kasamyagjnana, ri sḍengnya tiksna de nira gumawayaken ikang samadhi, tibra mwang sadhananya, an mangkana sira kepwan tan wruh ri tampuha ning jnana nira, apan sira tan wruhing hattyajnana, tan pasuluh samyagjnana, niyata saranguntit, salah wara juga samadhi sang yogiswara yan mangkana, phala ning brata juga manuntunaken, aminta bhinukti, amner mara ring swargga juga sang hyang atma yan mangkana, phala ning samadhi, yeka rumaksa phala ning brata, tlas pwa phala ning brata bhinukti dening atma ring swargga, tumurun ta sang hyang atma muwah, mangjanma ta sira ring manusaloka, yeka dadi ratu, mwang sugih, krtapunya janma sira, swabhawa ning manusa pwa ya, kinahanan dening tutur mwang lupa, ri kalanya tka tutur, kadadi pwekang sila rahayu dening janma, ri kalanya tka lupa, kadadi tekang sila mahala dening janma, irika ta yan maputeran, ring swargga naraka, manusa triyak wkasan. mangkana wasana ning wwang lumisin, tapwan ya tan samyagjnana. 42

kunang sira sang wyaparajnana nira rumuhun, ndan makaputusaning masimpen wasananya, yeka sang amrih mangusira kasamyagjnana juga, ya yatah sira makabhumi brata, tapa, yoga, samadhi, an tan wnang samyagjnana, yan tan makanimitta samadhi, apa kalinganya, nihan kramanya, ikang sattwa, rajah, tamah, tan angga patuta, tagawe hayu, tangenaken dharmma punya, mangkana ling nikang sattwa. krodhagleng aku ling nikang rajah. almeh, luhya, tamanganinginum, aturu juga, ling nikang tamah. mangkana kirakira ning sattwa, rajah, tamah, mapalangan tan patut, ikang rajah tamah, apunggung swabhawanya, ikang sattwa prakasa, prajnan widagdha, pinakaswabhawanya, menget pwa sang trigunatattwa [Ed. nigunatattwa] mangkana kramanya, matangnyan ikang rajah tamah, tineḍuhakenira ring samadhi, makasadhana pranayama, makasahaya citta buddhi manah, santalilang ahning, nirawarana, tan patalutuh, ikang jnana langgö nirmmala, enak pwatma nikang rajah, tamah, mapageh manut maring sattwa, prakasa irikang sattwa, nahan yukti nikang prajnan mtu saking samadhi, yawat kapanggih ikang prajnan, ariwariwa ikang samyagjnanan, katmu dening kayogiswaran, ikang samyagjnanan, kumawruhi prayogasandhi, makabhumi brata, tapa, yoga, samadhi, siramneraken dumunung dening amanggihaken yogawisesa, an makasuluh samyagjnana, makasadhana prayogasandhi, makabhumi brata, tapa, yoga, samadhi, ikang prayogasandhi, kangken hru malanḍep malungid, ikang samyagjnana, kangken helarnya, ikang brata, tapa, yoga, samadhi, kangkenikang danḍacapa, lumpasaken ikang prayogasandhi, makahlar ikang samyagjnana, makalaras ikang brata, tapa, yoga, samadhi.0// 43

nihan sang prayogasandhi, kengetakna, prayogasandhi ngaranya, upaya lwirnya, asana, pranayama, pratyahara, dharana, dhyana, tarkka, samadhi, manapusapus ika kabeh, sandhi ngaranya, ikang cetana juga wehen prakasa mangekatwa, tan parorwa ngadeg, hemeng tan paḍem, mawak ing caturdhyana, caturdhyana ngaranya, lwirnya, tisthan, bhojan, gacchan, suptan, tisthan, bhatara malungguh, bhojan, bhatara mangan, gacchan, bhatara lumaku, swaptan, bhatara maturu, sangksepanya, bhatara juga katuturakna, sapolah bhawa ning wwang, apan ikang tutur ngaranya, yeka pasariran bhatara mangke ring sakala. muwah hana tasana ngaranya, lwirnya, padmasana, wajrasana, paryyangkasana, swastikasana, widyasana, danḍasana. nahan ikang asana, nem prabhedanya, tunggal awaknya, ya ta pilihana palungguhana, sang mangabhyasa prayogasandhi, tlas pwa sira malungguh, ya ta sira umimpenaken sang hyang urip, peten ring ekacitta, tlas kempenan sang hyang urip, mapranayama ta sira, hana wayu pamaseh ngaranya, lwirnya, recaka, puraka, kumbhaka, recaka ngaranya, wetwaknekang wayu rumuhun sangkeng tutuk, hentekna, muwah tngen kuñcinen, patguhen, sakla ring anguñci, muwah ispen ikang wayu, yeka puraka ngaranya, kumbhaka ngaranya, ri tlasnyangisp ikang wayu, pgengen, kuñcinen patguhen, sahulihing anguñci, wijilakna ring netradwara, yapwan tan abhyasa, wijilakna ring irung, mahalona hayeki [G: iritirita yeki] numbek, ping pitu diwasa ning anguñci, yan anghel taharrayyana, tuhun ikang kuñci haywa tumular, don ikang pranayama, ginawayaken ring tduhaning rajah, tamah, ri prakasa ning sattwa, nguniweh haywa ning sarira towi. muwah hana ta kuñci lyan sakerika, tan pametwaken wayu, sangksepanya, humnang juga, nlan gugusika recaka, kumbhaka, ika rumuhun, yatanyan gawayakna ikang kuñci rahasya, sangksepanya, ikang cetana juga welen prakasa, andelakna ring kadalipuspa, ya pwanenakanḍel nira ngkana, karengö tikang hati saheneb, wrustakeng ring antahkarana, ndah yatika sinangguh mamujaken pranasandhi la jati, ngaranya, yeka pujajati ngaranya, sembah hyang alit, yapwan mangkana tiksna dening asamadhi, wyakta hilang ikang wayu ganal, mati lina ri sangkanya, apan tañcinetana dening atma, nahan margga kuñci rahasya ngaranya. 44

muwah hana ta pratyaharayoga ngaranya, ikang indriya kabeh wateken sakeng wisayanya, kinempeling citta buddhi manah, tan wineh maparanparana kinempeling cittalila, yeka pratyaharayoga ngaranya. ikang jnana tan parorwa, tan pawikara, enak tikang hnanghningnya, umiḍeng tan kawaranan, yeka dhyanayoga ngaranya. tutup ikang dwara kabeh, irung tutuk, talinga, wayu rumuhun isepen, wetwen ikang wunwunan, kunang tan pabhyasa ikang wayu winehadalana ngkana, dadi adalaneng irung, halon wtu ning wayu, yeka pranayamayoga ngaranya. hana oṃkara sabda mungguh ring hati, yateka dharanan, ya pangilang ikang karngö, ri kala ning yoga, ya teka sunya ngaranya, siwatmawak bhatara siwa yan mangkana, yatika dharanayoga ngaranya, ndakasa rakwa sang hyang paramartha, ndan palenanira sakeng atma, tan hana sabda ri sira, ya ta kalingan ing paramartha, palenanira sakeng awangawang, paḍa nirekangalilang, yeka tarkkayoga ngaranya. ikang jnana tan pangupeksa, tan pangalupa, tan ana kaharp nira, tan ana sinadhya nira, malilang tan kahilangan [prob: kalilangan], tan kawaranan, tan pawastu ikang cetana, apan mari humiḍep ikang sarira, luput sakeng caturkalpana, kinawruhan, mangawruhi, mangdewruh, ikang caturkalpana ngaranya, ika ta kabeh, tan hana ri sang yogiswara, yapwan enak palungguh nikang citta hning, yeka sinangguh mulih ring ambek ngaranya, yeka purwwa ning cetana pinratistha, linungguhaken ing ambek ngaranika yan mangkana, kapingro ning tutur pinahayu, kumwa pwa lingnya, ikang ambek ya ta waluyakna pramana, umapa dening umaluyakna kang ambek pramana, nihan ikang citta buddhi manah, juga watken wehan makawakang tutur prakasa, sphatikopama, kadi manik sphatika, yapwan enak tiksnanya, yeka sinangguh sphatikajnana ngaranya, yapwan enak prakasa dilah sang hyang sphatikajnana, gsengenira ikang sarwwatattwa, lawan subhasubhakarmma, apa dening gumsengan subhasubhakarmma, mwang sarwwatattwa, nihan pih, sang hyang sphatikajnana juga lunguhakna ring brahmasthana, yapwan enak andel nira ngkana, gseng bhasmibhuta kahiḍepan ikang sarwwatattwa mwang subhasubhakarmma, yatika sinangguh mamuja, mahoma ring kunḍajati ngaranya, umentyaken ikang sarwwaklesa kabeh, yeka sinangguh dharanayoga ngaranya. 45

kapingtiga ning cetana pinratistha, kumwa pwa lingnya, ikang oṃkara pranawa hana ring hrdaya, yata linakna ring siwatattwa, kalinganya, ikang citta pih, luputakna sangka ring anggapradhana, wehen mangekacitta ring suksma juga, makawaka ng turyyapada n don menget wruh sira wisesa, lmeng dumling tan paḍem, kadi laksana ning pañjut haneng jro ning dyun, tan polah, tan kḍek, lmeng mangadeg, juga mangekacitta lwira jnananta, makawak ḷngang ning tutur, ri tleng ning sandhijnananya, nda turunga taya tapwan turu, apan sḍeng makawakang jagrapada ngaranya, mapanggih pwa kang jagrapada, lawan turyyapada, ḷyep tang watek dewata, amisra ring dhyana, nda kasa [prob: ndakasa] lyan tutur hiḍep sang hyang pradhana, msut sangka ring anggapradhana, ya sinangguh abhisandhi ngaranya, papasah ning pradhana, lawan purusa, anganti ring patajya ning tutur mwang lupa, sang hyang atma yan mangkana, ya ta sinangguh muwah dharmmawisesa ngaranya, makawak wasana nikang saptangga, saptamrta, inandelan ta sira dening saptagni. saptangga ngaranya, purusa, sattwa, rajah, yamah, buddhi, manah, ahangkara. saptamrta ngaranya, sabda, sparssa, rupa, rasa, gandha, kinawruhan, sinangkalpa. saptagni ngaranya, manon, mangrngö, mangrasa, mangambung, mangaku, mamastwani, mamikalpa. yan kawruhan ikang saptangga, an pinakawak de sang yogiswara, yeka nimitta ni rasana paripurnna sarira nira, tan kneng wighna, tan kneng jaramarana. yan kawruhan ikang saptamrta, an pinakahurip nira, yeka nimitta nira sang yogiswara yauwana, tan paḍayusa nira lawan janma samanya. yan kawruhan ikang saptagni, umndeli sira, yeka nimitta nira sang yogiswara, wnang sira wyapi, wyapaka, wnang sira sakamakama, mangke ri sakala, apan bhatara mahulun makangaran saptagni, ya ta matangnyan sang hyang saptagni panggseng nikang saptangga, saptamrta, apan ika mangdadyaken upasargga, upasargga ngaranya, wasana nikang triguna, rumakt ing sarira ning atma, nihan drstopama, kady anggan ikang dyun wawan hinggu, alawana hinggunya sangkerikang dyun, wasehanekang dyun pahalilangen, ya yatah mambek juga kang linggu irikang dyun. iwa mangkana ta wasana ning triguna, rumakt ing sarira ning atma, an tar wawang hulang dening samadhi, tambayan, ya ta gsengan de sang yogiswara, ndya kari lwir nikang upasargga nihan. 46

yapwan hana katon kadi gandharwwa, hana kadi widyadhara, ya ta manungsung ri sang yogiswara ri kala ning yoga, muwah hana ta marupa dewata, manungsungi singhasana mas, manon malungguha ri sang yogiswara muwah hanona rsi ḍateng, mamuja ring puspawarssa, athawi umawa harttha ning aji, ndan ahajara kunang sang yogiswara ri kala ning yoga, sattwopasargga kapanggih de sang yogiswara yan mangkana. kunang yan katon, kadinuntitaken, kadinayun, kadinulahulah, hana kadi binongbong, hana kadi manglayang ring akasa, kunang awak sang yogiswara ri kala ning yoga, atawa don danawa, kunang daitya, raksasa, umalangi samadhi sang yogiswara, rajopasargga ika yan mangkana. kunang yan abyet awak sang yogiswara ri kala ning yoga, atawa kagyatahumaras kumtuga, gegengen rumabmuriring, hana kadi pinteken ring haten, hanan malupa wiparita, kadi hilang ikang cetana, ri kala ning yoga, prayatna turu sanghulun, tamah ika kapanggih de sang yogiswara yan mangkana, nguniweh yan matmu ri yanta ning yoga, kunang ikang upasargga, bhaya n kita yan mangkana, hana gawe hala ta pwa n bhinukti, phalanya kalinganika, ata prihen gsengana de sang yogiswara, wangunenirekang samadhi, muwah sang hyang saptagni, igapi nira, wehen prakasa ikang samadhi, makawakang tutur sarwwajna, sarwwakaryyakartta, yapwanenak dilah sang hyang saptagni rikang samadhi, gseng bhasmibhuta kahiḍepan ikang upasargga, kawkas tawak sang hyang saptagni rikang samadhi, gseng bhasmibhuta kahiḍepan ikang upasargga, kawkas tawak sang yogiswara, alilang ahning nirawarana tan patalutuh, kadi lilang ning akasa, yeka sinangguh tarkkayoga ngaranya. 47

waluya ring antawisesa, ika sang hyang atma yan mangkana, waluya sayodya lawan bhatara sadasiwatattwa, muwah sarwwajna, sarwwakaryyakartta, jnanasakti, wibhusakti, prabhusakti, kriyasakti, luput sangkeng karmmawipakasaya, ikang sadasiwatattwa, karmmawipakasaya ngaranya, karmma ngaraning gawe halahayu, wipaka ngaranya, rateng phalanya bhinukti ring sarira, asaya ngaranya, sesanya bhinukti, ya teka rumaket ing atma mamangun karmma muwah, ya ta sinangguh wasana ngaranya, yan ahala wasana nikang karmma nguni, mogha maharp magaweha hala ikang wwang denya, yan ahayu wasana nikang karmma nguni, mogha maharp magaweha hayu ikang wwang denya, tan hana pweka kabeh, rumaket ing atma, yeka luput sangkeng karmmawipakasaya ngaranya, sinangguh riya, aliwat sangkeng halahayu, ikang sadasiwatattwa, nahan kapingpatang cetana pinratistha linungguhaken. kapinglima ning cetana pinakahayu, kumapwa lingnya, sang hyang wisesa, maluyaknantawisesa, mapa dening umaluyakna sira ring anantawisesa, nihanta turyyantapada, juga pinakawak dening samadhi, turyyantapada ngaranya, luput sangkeng rwa, rwa ngaranya, tan hana, tan taya, kalinganya, achedyachedya, alit sakaring alit, suksma sakaring suksma, luput sakaring para wyapara, mari sarwwajna sarwwakaryyakartta, kewala nisprayojana juga tan laku, tan hili, tan limbak, tan polah, asthiti umiḍeng juga, yeka sinangguh samadhiyoga ngaranya, apan samadhi ngaranya pinakapusapus ning sadhana kabeh, nahan kasthityan bhatara sadasiwatattwa, yeka sinangguh maluya ring antawisesa ngaranya. 48

yapwan mangkana lwir nikang samadhi, kapangguh de sang yogiswara, wyakta sira makadrbya kastaiswaryyan mangke ring sakala, mapa sinangguh kastaiswaryyan ngaranya, manunggung sampun manemwaken yogawisesa, hana kasiddhyan ngaranya, lwirnya nihan, anima, laghima, mahima, prapti, prakamya, isitwa, wasitwa, yatrakamawasayitwa, anima ngaranya, ikawak sang yogiswara, ganal tambayan, wkasan alit, suksma, ya ta matangnyan sang yogiswara wnang saparanira, tan katahan sira dening gunung watu, wnang ta sirasilurup ing lmah, tan hana maḍana kaiswaryyanira, yeka sinangguh anima ngaranya. laghima ngaranya, ikawak sang yogiswara, abyetambayan, wkasan aḍangan kadi kapuk, ya ta matangnyan sang yogiswara ambara margga, anampak gagana, majalantara, wnang manampak wwai, yeka kaghima ngaranya. mahima ngaranya, mara sira ring desantara, pinuja sinembah sira kinabhaktyan sira, saparanira tan ginulangulang, yaika sinangguh mahima ngaranya. prapti ngaranya. nda sakahyunirekang wastu, tan ulihi nganghel, yeka prapti ngaranya. prakamya ngaranya, wnang ta siragawe rupa nira dady anom, dady atuha, dady alanang, dady awadon, wnang ta siramasuki ng jnana, irikang rat kabeh, yeka sinangguh prakamya ngaranya. isitwa ngaranya, mara sira maring swargga kahyangan, pinuja inarccana sira dening watek dewata kabeh, atawi wnang sira umadeh ikang watek dewata, ri kahyanganira, tan hana dewata sumikareng sira, apan bhatara mahulun hana ring awak sang yogiswara, yeka sinangguh isitwa ngaranya. wasitwa ngaranya, tan hana wnang langghana sawuwus nira, tan kahalangan sira ring sakeccha nira, yeka sinangguh wasitwa ngaranya. yatrakamawasayitwa ngaranya, wnang ta sira tumimbah ikang watek dewata, isa tmahanya, tan hana wnang langghana sawuwus nira, tan kahalangan, sawalen wnang ta sira sumapa dewata, mangdadya manusa, yan langghyana ri sira, yeka sinangguh yatrakamawasayitwa ngaranya. 49

nahan tang sinangguh kastaiswaryyan ngaranya, cihna sang sampun manemwaken yogawisesa, apan tan heḷm ngaranya, ri tka ning pati, kang sinangguh kalpasen ngaranya, mangke juga katona cihna nira, sang amanggih kalpasen ngaranya, apan tan kawnang sinilingaken sang sampun cihna, manemwaken yogawisesa. apa dumeh sang yogiswara, tan wawang lpas, apan sampun ngaranika sira mamangguhaken yogawisesa, atawi lyan wnang ta sira wyapi wyapaka mangke ri sakala, wnang ta sira tuminggala urip nira, tuminggalakna anggapradhana, tan hana kapwa karmma rumaket ri sang yogiswara, apan tlas ginseng nira ika kabeh ri kala ning yogapada, ya ta matangnyan tan hana karmma rumaket ri sang yogiswara. sugyan mangkana linga sang para, nda wasana nikang rajah tamah ngaranika, tlas ginseng nira nguni ri kala ning yogapada, wasana ning sattwa yeka mangawesa ri sang yogiswara, apan jatinya n rakwa mangkana, apan phala nikang buddhi sattwa rakwa pangilang sang yogiswara, ri phala ning buddhi rajah, maḷs ta phala ning buddhi sattwa, pinakawak de sang yogiswara, wkasan ya ta bhinukti de sang yogiswara, inentyakenira pepedanya, winimba jaya pinawolunira, wineh nira makawakang kastaiswaryyan, yapwan hentya wasana nikang sattwa bhinukti de sang yogiswara, irika ta yan mapasah ikang pañcamahabhuta, mulih ry asthiti nira sowangsowang, mangkana sang yogiswara, menget matutur juga sira, mulih sayodya sarira, lawan bhatara paramasiwatattwa, makasadhana ng prayogasandhi, makabhumi brata, tapa, yoga, samadhi. 50.
iti sang hyang tattwajnana, sang hyang prayogasandhi, parisamapta. om. makasuluh samyagjnana. om.

3 komentar:

  1. bolavita agen bola dan sabung ayam terbaik indonesia dengan minimal taruhan 50rb

    Boss Juga Bisa Kirim Via :
    Wechat : Bolavita
    WA : +6281377055002
    Line : cs_bolavita
    BBM PIN : BOLAVITA ( Huruf Semua )

    BalasHapus
  2. AGEN JUDI BOLATANGKAS ONLINE TERPERCAYA!
    TANGKASNET dan 88TANGKAS !

    Segera Bergabung Bersama Kami, Hanya di www.agentangkas.co
    BBM : BOLAVITA ~
    WA : 0812-2222-995 ~

    PREDIKSI AKURAT TOGEL SINGAPURA

    BalasHapus