Banten Upakara ring Bali
Om Swastiastu, Om Awighanamastu Namo Siddham
Pinih riin atur titiang, sakatilinganing ambek sembah pangubakti miwah angayubagia, riantukan asung kerta wara nugraha Ida Sang Hyang Widi Wasa, miwah piteket-piteket, kalih panureksan saking sang wikan ring pariindikan sastra miwah agama Hindu utaman nyane ring Bali muah ring se jebag dura Desa Bali pulina lan Nusantara. Titiang purun prasangga mipil utawi ngapupulang indik tatandingan upakara utamane tetandingan sesayut lan tetandingan tetebasan puniki mangda anggen titi pengancan ritatkala mekarya upakara riwekas.
Gumanti titiang prasida ngaturang cakepane puniki medasar antuk manah pangkah tur tambet.
Pupulan puniki ambil titiang saking makueh cakepan-cakepan sane sampun kewedar, sane medaging tetandingan upakara utamane tetandingan sesayut lan tetebasan. Riantukan meled pisan manah titiyang ring sejeroning kahuripane puniki mangde wenten anggen titiang meyadnya ring para semeton Umat Hindu utawi Umat Se-Dharma sejebang Bali muah sejebag dura Desa Bali pulina. Malih pisan ampurayang mungguwing kelanggahan titiange purun mipil buku puniki tan sios mangda keanggen titi pengancan muah sipat siku ritatkala mekarya tetandingan upakara muah tetandingan sesayut lan tetebasan. Siosan ring punika antuk kanistan titiang mebuat pisan, janten sampun akeh kekirangan-kekirangan nyane ring daging buku sane pupulang titiang.
Dumogi cakepane puniki wenten pikenoh nyane ring Umat Se Dharma anggen titi pengancan ring sejeroning nabdabin pemargin yadnya sane keanggen riwekas. Maka panguntad atur titiang, ngelungsur sinampura antuk kekirangan-kekirangan pupulan puniki, ledang para widagdeng aji nagingin kekirangan-kekirangan pupulan puniki, mangde sida sampurna. Matur Suksma
Om, Santih, Santih, Santih, Om
Tetandingan Upakara Banten Ring Bali
Canang gentuh : Metaled antuk ceper, wiyadin merupa kadi reringgitan, tetaledane dagingin pelawa, porosan antuk sedah, porosan medaging apuh, lan jambe metegul antuk talin porosan, susunin wadah lengis, sekar lan pandam arum, suksman nyane penunggalan kayun suci, jagi parek ring Hyang Widhi Brahma, Wisnu, Iswara, punika seranane, jambe apuh lan sirih.