Google+

Lontar Usada Manak 14b – 25b

Lontar Usada Manak 14b – 25b

Pañêsêh ari-ari grita, sa, taluh siyap abungkul, ngêmpug cêpolang ring dadasar, tibakin yeh angêt ne gêmulak, raris inumakêna, taluh ika untal, dadasar ika rinajah, ma. Om sang bhuta angadang, maring gwa garbane syanu, sira sang bhuta tustundung, sira sang bhuta kakawah, sira sang bhuta ari-ari, sira sang bhuta ambah-ambah, kabeh sira sang bhuta, tututin kakanta, sang rare cili, suwe sira sang rare cili, ngantos sira, ring lêmah, bapa babunta, age sira [14b] den agêlis, prapta sang gagak bhirawa, harêpana katêmu maring sira, mêtu 3, cok bor, 3. mudul kadi tikus, angulati lakine, cêlos cuwas, 3. Iki rarajahan dadasare.

Nihan tamba sarab, iñja kawasa, yanya pagontol, sa, Om brahma, Om kul, wuntêng bawang, adas, uyêg, olesakêna.

Ta, yan twara ñak ring nasi, lolohnya, sa, biyu krutuk ne nasak, wuntêng cêkuh, don sandat, 3, bidang, bawang adas, ma. Om di madidih, mulih maring basang madidih, waras waras ring ngiso, yah, 3, kedêp [15a] siddhi mandi mantranku.

Ta. sawan, yan agrah makalêmah, sa, kapkap, isên, bawang, sêmbar raganya makaukud. Yanya êmbêt ñêm, sêmbar wêtêngnya, sa, bangle lan kasuna jangu.

Nihan usug sawan, sa, don kelor munggi, wuntêng bawang, lêngis tanusan, kêpêl awaknya makaukud.

Ta. sawan tangis, sa, obat, pees gadubang, basmakêna bilang sandi, ma. Om sasak sawan kabeh, salwiring sawan salabyanya swaha, mêtu denya sawan kabeh, lah poma.

Tingkahing sawan naga, kliyad-kliyud, tur nguyang, cangkêmnya ciplak-ciplak, layahnya sêler-sêler. Ta, nya, sa, padangalya sakamulan, myana, masui, trikatuka, [15b] wêdakakêna. Maka usugnya, sa, don kelor, kasuna jangu, yeh cuka, tasik têlung kupak, maka lolohnya, sa, gamongan, inggu, cêkuh, 3, iyis, sari kuning, mêñan.

Pangunduran sawan, sa, intaran sakamulan, kasuna jangu, cakcak, pet bangkêtnya, inumakêna, ampasnya wêdakakêna, ma. Om sawan sawiwit, sawan bantang, sawan jêjêt, sawan lilit, sawan lutung, sawan bojog, sawan bukal, sawan têgahan, sawan deûti, acêp-acêpan, kagêsêng denira bhatara Brahma, Om gêsêng, salwiring sawan kabeh, têka gêsêng, 3.

Malih loloh sawan, yanya ngêmbêt ring wêtêng, sa, kapkap, [16a] don paya puwuh, katumbah, kuñit, lunak, uyah, pet bangkêtnya, raris dadah lêpahang, wus embon dêgdêgang, êningnyane inumakêna. Maka sêmbar pusêrnya, sa, inan kuñit, makikih, mêñan, gula jaka, tambusin. maka lolohnya, sa, muntis sakamulan, lunak, bêjêkin uyah, prasama panggangin, kuñite tambusin, kêtan gajih, bangkêtnya inumakêna, ampase anggen sêmbar laranya maka sami. Maka papusêrnya, jêbugarum, jangu, kulit pangi, prasama gêsêng, adêngnya campuhakêna, raris uyêg, prêsin bangkêt kuñit, pees gidubang, tampêl pusêrnya.

Ta. rare êmbêt, yanya [16b] kêbus ring wêtêngnya, sa, buah dalima ne dadah, muñcuk kasimbukan, ne putih, bawang matambus, adas, pulasai, sêpêt-sêpêt, galih jatunya, tahapakêna. Sêmbar sikûikanya, rauh ka tulang giying, tulang cêtik, dening, sa, don ñambu renteng putih, rauhing krikan carangnyane, bawang adas, bras bang. Tutuh irungnya, sa, tuwak kasimbukan, bêjêkin untêng bawang matambus, raris saring, êningnyane tutuhang, nging durungnya nutuhang dayuhin tutuh ika sawêngi.

Nihan patêngêran lare iñja, yanya ngutah mising, nga. iñja pêpêrak, ada kêntêl ada eñceh, ta, sa, akah padang kalamêñca, isin tingkih, bawang [17a] adas, bangkêtnya inum. Yanya bêsêh ring awak mangêbêng-êbêng, rauh ka batis, nga, iñja inggu brahmà, ta., sa, rwaning kasambi têkaning babakanya, pangi, sakamulan, katumbah, isen, gamongan, wêdakakêna.

Yan akuru laranya, nga. iñja pusuh, ta, nya, sa, rwaning pepe, bawang adas, majatu tain kêbo, wêdakakêna.

Malih sasuhuk iñja, sa, yeh asibuh, kêtisin sugiang inum, pada maping 3, ma. ih iñja ong iñja naga, iñja lilit, iñja gantung, aja kita manglaranin i barak, iñja blatuk, iñja gêtih, aja manglaranin i barak, iñja brahma, iñja bañu, aja anglaranin i barak [17b], apan aku wruh ring kadadenta nguni, mêtu kita ring dasar pritiwi, ring dasar kawah agung, ung ang tumurun bhatara Agni, angsêng akuweh iñja, tumurun, ung mang tumurun bhatara Iswara, angurip anambanin i barak, lah ta urip 3, siddhi mandi mantranku. Wêdak iñja, sa, don kalayuan, don têlêng, katumbah, yeh cuka.

Ta. iñja keskes kores, bêngêl gênit, wêdaknya, sa, don ñambu wer, isen, kuñit, katumbah, 3, bêsik, pulasai, sami krusuk, wêdakakêna.
Ta., iñja gatêl, sa, don sotong, panggang, isen, kuñit, katumbah, miñcid dêha, ulig, wêdakakêna.
Wêdak saluwiring [18a] iñja, sa, don basa-basa, panggang, isen, katumbah babolong, sêpêt-sêpêt, samparwantu, trawas, miñcid dêha, wêdakakêna.
Ta, iñja, sa, don paya puwuh, gamongan, isen, katumbah, pulasai, iñja-iñjahan, prasama kikih, ulig, wêdakakêna.
Ta. iñja pagontol mwang bêsêh, sa, ong brahma, ong kul, bawang adas, wêdakakêna.
Malih, ta, iñja pagontol, sa, umbin yangbubu, kulit waluh pahit, tuñjêl, adêngnya uyêg ring pees gadubang, olesakêna laranya.
Ta, iñja bêngka, sa, rwaning paya puwuh, gamongan, kuñit, adêng balulang kêbo, [18b] jatunya, iñja-iñjahan, cakcak, pet bangkêtnya, tahap.
Ta, iñja bêngka, sa, akah biyu gêdang saba, akah bayêm barak, bawang adas, kêtan gajih, tahap.
Ta, iñja mising, sa, pusuh dalima, untêng kuñit, sintok anggen jatu, iñja-iñjahan, pet bangkêtnya, tahap.
Ta, iñja mising, sa, biyu krutuk ne nguda, bungsil ñuh barak, bawang adas, sêpêt-sêpêt, pet bangkêtnya, tahap. Ampasnya anggen uwap, jatonin babakan sêntul, mwang tampêl ring tulang cacêtiknya.
Ta, iñja mising nanah gêtih, sa, isêp nanah, isêp gêtih, babakan tui putih, akah têlêng putih, bawang adas, [19a] miñcid deha, pet bangkêtnya, tahap. Ampasnya anggen uwap.
Ta, iñja tan harêp amangan, sa, muñcuk wadani, muñcuk kasimbukan, muñcuk pañcarsona, kapanggian tis, untêng gamongan, isin tingkih, tahap. Malih, ta, lare watuk, sa, baluntas sakamulan, bawang adas, tahap.

Ta, lare mawatuk, sa, santênkane, asêm lunak, êtum, tahap.

Ta, iñja tiwang sawan, sa, paya puwuh sakamulan, isen, gamongan, bawang adas, inggu, yeh juuk, tahap. ma, ih bhatara Guru, ingsun añaluk larane syanu, ingsun anambanin lare tiwang sawanên, salwiring tiwang sawan, langkuwas [19b] pamunah tiwang, lampuyang pamunah sawan, bawang tambus aku neûti, adas panglêburanta, juuk maka pangurip bayune syanu, apan syanu anak bhatara Guru kapupug kalêbur lara patakane syanu, siddhi waras wastu ya nama swaha.

Ta, sawan tiwang, sa, base tampinan gênêp, kasuna jangu, pakpak, bangkêtnya basmakêna, ma. ih lawas, lawas, ara kami, bhuta lombok, tanu kami, bhuta lomboke to kami, waras, 3, sidhi mantranku.

Yan pulês lêplêp, nga, iñja gagêt, ta, nya, sa, kalampuak, tasik irêng, wêdakakêna.

Ta, iñja grah, mamalêman, sêmbarnya don sêmbung, tasik 3, [20a] kupak, sêmbar raganya kabeh.

Yanya sakit silitnya, tur mêtu rah nanah, nga. iñja kuliran, ta, nya, sa, lublub carang waru, bawang matambus, adas, bras bang, jatonin tain jalati, santên kane, tahapakêna. Maka uwapnya, sa, don kapas taun, bawang adas, sêpêt-sêpêt, pamor, miyeh jun tanêg.
Malih yan mêtu rah ananah tur madidih, nga, iñja sumsum, ta, nya, sa, akah êntal, akah glagah, bawang matambus, adas, sêpêt-sêpêt, bras bang, jatonin tanah batan sanggah kamulan, tahap.

Yan angutah mising, nga, iñja galira, ta, nya. sa, babakan juwêt sakamulan, kêtan iñjin, pada majumput, [20b] bras bang duang jumput, cakcak, bêjêkin bawang matambus, malih prêsin yeh sambuk kalungah, apang bukêt raris dadah, gula makrik ban sidu, di sembene, akikit, raris irag, tahapakna.

Yan lare kuat amangan anginum, nging awaknya brag ngarigis, wêtêngnya kêmbung, nga, iñja gragêt, sa, bañun iñjin, lêngis dêgdêgan, gêtih siap sêlêm, pada keh takêhnya, raris campuang, irag, raris pakinêmin, nging dewasain nangkan kajêng kliwon, makinêm ping têlu maka sañja, ma, Om limur ring ati, muwaras, 3, Om muryang, mursyah, 3.

Pamuug lare bêsêh, sagênahnya mwang iñja, sa, don kapaspasan, [21a] don bamabang, adas, ulig, wus amantra urapakêna ring bulun siap, ma, Om prawatêk dewata paum, bhatara Guru nora ditu, sing têka wurung, 3. lêkasakêna, kawasa.
Malih yanya bêsêh socanya, apang êda lamur, mwang kutikan, sa, babakan juuk linglang, mwang kulitnya, buahnya, anggen jatu, isin tingkih jêntung, kuñit ayis, ulig agigis, pakpak raris sêmbar, ma. Om batu putih, tumbuh di têngah sagarane, gêtih mapupul, bañêh mapupul, têka punah, 3, syah galah apadang.
Malih, ta, nya, sa, umah kalisasuan, untêng bawang, adas, ulig, urapakêna, japain, [21b] mantranya kadi ring arêp.

Ta. iñja brahma, sa, tanah panasar waton, bêjêk ring yeh añar, inum, ma, ih rare anêmu syah, brahma muksah, iñja muksah, muksah iñjane syanu, têka muksah, 3.

Yanya uyang sada sêbuh awaknya, nga, iñja lêkêd, ta, nya, sa, sembung ati, untêng bawang, adas, tasik arêng, jatunya, bênang pêlung sacêngkang, lêbokakêna ring lolohe, raris bêjêk, tahapakêna.

Ta, iñja leplep, sa, bawang tunggal, 3, bêsik, goreng aji lêngis tanusan, olesakêna, wus maoles, simbuh aji don undis, don sidawayah, mañahñah, [22a] katumbah, 3, bêsik, sêmbar.

Yan ring sirah mananah, nga, iñja wawatih, ta. nya, sa, akah tampak liman, akah siligui luh muani, akah padang lêpas, akah padang blulang, bayêm lalahan, isêp nanah isêp gêtih, kapanggian tis, sêpêt-sêpêt, cakcak raris tambus, tahapakêna.

Yanya madidih tainya, tur ya putih, rauhing tainya, nga, iñja ujan, ta, sa, iñja ilut, bawang adas, inum.

Yanya barak tainya, nga, iñja turut, ta, nya, sa, akah bayêm barak, bawang adas, kêtan gajih, tahapakêna. Maka sêmbar basangnya, mwang tulang giyingnya, rauh ka sikûikanya, sa, bras mês, batun nangka bubuh, [22b] sêkar jêpun, bawang adas, isin tingkih.

Yanya grah awaknya, tur bêngka wêtêngnya, mwah pajêlêjêh awaknya, ika, nga, iñja turut kambuh, ta, nya, sa, don lima, katumbah, uyah, sêmbar mak kabeh, ma. Om ang mursyah, 3, swaha.
Yanya grah awaknya, tur ya kiyad-kiyud, awaknya biru, rauh ka soca, nga, iñja naga, ta, nya, sa, sintok mapanggang, bras bang, wêdakakêna ring raganya sami, maka tamba inumnya, sa, akah pepe, akah êntut balu, bawang adas, tahapakêna.

Yan barak muñcuk layahnya, ika, nga, iñja kaliaga, sa, ulêd biu, santên kane, damuh, tambus, suba embon, prês, campuhin yeh [23a] tombong, tahapakêna.

Ta, lare anangis tur pêjêt, krik wêtêng lêmah, tulis tundunya, aji pamor, mantranya tinulis, ma. a. 3, alimah-alimuh, 3, swaha, 3, mursyah, 3, galang apadang.

Ta, lare kêlar ngutah, ngluah twara êmbang sadina, ika, nga, iñja sawan sarab riyak, ta, nya, sa, cêkuh, kuñit, katumbah, majakêling, uyah, cakcak, raris tambus, tahap. Maka simbuh ulun atinya, sa, buah jêbug, mapanggang, lan sintok.

Ta, iñja curêk, sa, kuñit warangan, kasuna jangu, ulig, pet bangkêtnya, raris tum, tutuh kupingnya.

Ta, curêk, sa, inan kuñit matambus, kulit buah [23b] jêbug, tutuh kupingnya.

Ta, lare siksik, sa, kraras biu kayu, malih batune di tengah tukade, toktok ditu jalan mula, olih pada timpalnya kêpihannyane juang, lablab apang lêpah, isen kapur, 3, iyis, donnya, 3, bidang, simbuh ngasai, mwang sugiyang.
Yen siksike ngambah ka mata, haywa nglablabina tambane kadi ajêng, wênang anggen pupur muanya, mwah papilis alisnya dening bungan pucuk lamba, rajah kadi iki.
Malih, ta. siksik, sa, don bungkak nyingnying, lublub tingkih, sêmbar ring gênahing laranya, ma, Om sêlêr-sêlêr silalar, arêp akukubon, ênduh kita da ditu, [24a] don bungkak nyingnying, lublub tingkih, angundurana kita, muksah kita, muksah, waras, 3.

Ta, lare pêcehan, tan êmbang, tur malompo-lompo, sa, gêtih siap biying, matunu, wus lêbêng, uyêg mapêpês, yeh juuk mapanggang, urapakêna, ma. pandusanira bhatari Durga, kinabur tanana lêtuh.

Ta, mata rusak, sa, mênuh sakamulan, galih 21 bêsik, ulig, olesakêna, ma. angadêg tejan matane syanu, lunggahing gadung sêkaring sempol, maka pangundur anêmu mundur kita, pritiwi kabeh, iridakêna sanak putunira kabeh, têka luwar, 3.

Iki pamlasan rare, nga, yanya sêdêng larene mabêlas, wus [24b] mangkêp wulananya, mwah wotonanya sêdêng bêlas, samalih dinane mabêlas, wênang anuju tulus, mwang guru ning was, nga, sa, yeh mawadah sibuh, lêbokakêna sêkar jêpun, 3, katih ne tilêh, wusnya ngamujain toya ika, katisang aji sêkar jêpune, ne akatih, anggen ka pipis, mangêtisin larene, maka têlung katih, anggon bungane, pada mapisan, dadi makêtis pang 3, smalih wus makêtis, wusan larene manginum, ping 3, raris suginin ping 3, wusnya sisahang toya ika akêdik, pacang mauyêg gulane, jatunin pamor, pacang mangolesin muñcuk ñoñone, wusanya turuhin [25a] sapisan, uli di sirah larene, antuk yeh ane di sibuhe, malih sêkar jêpune sibak pah dua, ne akatih, sêkarin kuping larene, pada masibak, ne duang katih malih blasang, bok larene gantungin akatih, plangkiranya akatih, iki pujanya ma. meh wibuh, 2, meh biu, aja ta sira eang, ring ingsun, ingsun asasanan awak sarìra kami, poma, 3, sira arin ingsun, tan engêt ring susuning ibu, poma, 2.

Nihan mantran cêkehan, sa, wênang, ma. ura-urêk gatêlku mati, hêêp, 3. Iki kakambuh, linggan bhatara, sa, lontar rinajah, sêmbar dening trikatuka, gantungakêna [25b] luhuring aturu kawasa, buntil ing arêp kawasa, iki ta rajahan lontar iki. puput.
sumber: Sastra Unud – cakepane.blogspot

1 komentar: